Dr. Mircəlal Kazımi: Azərbaycanda 700-ə yaxın insan sağlığında orqan bağışlanmasına razılıq verib

Azərbaycanda Cənubi Qafqaz regionunda ilk dəfə olaraq meyitdən orqan köçürülməsi əməliyyatı uğurla həyata keçirilib. Mərkəzi Gömrük Hospitalının Cərrahiyyə və Orqan Transplantasiyası şöbəsinin həkimi, doktor Mircəlal Kazımi jurnalistlərlə söhbətində bu hadisənin Azərbaycanın səhiyyəsi üçün mühüm əhəmiyyət daşıdığını bildirib. O qeyd edib ki, artıq bir neçə pasiyent meyitdən alınan qaraciyər, böyrək və gözün buynuz qişasının köçürülməsi nəticəsində sağlamlıqlarına qovuşublar. Bu, bütövlükdə Qafqazda böyük tibbi irəliləyiş hesab olunur.

Həkimin sözlərinə görə, orqan transplantasiyası sahəsində ilk əməliyyatlar ölkəmizdə hələ ötən əsrin 70-ci illərində icra olunub və bu ənənə bu gün uğurla davam edir. Həmçinin, 2008-ci ilin dekabrında Cənubi Qafqaz və Orta Asiya regionunda ilk dəfə həyata keçirilən qaraciyər transplantasiyası da bizim səhiyyə sistemi tərəfindən yerinə yetirilib. Bugünkü nailiyyətlər isə Səhiyyə Nazirliyi və TƏBİB-in güclü dəstəyi ilə mümkün olub.

Dr. Mircəlal Kazımi vurğulayıb ki, beyin ölümü hallarından sonra orqanların bağışlanması istiqamətində ölkədə artıq müsbət təcrübə yaranıb. Bu proseslər nəticəsində xəstəxanalar arasında koordinasiya güclənib, orqan bağışlanması insanlığa xidmət kimi həyata keçirilir. Sevindirici məqam odur ki, artıq 600-700 nəfərdən çox vətəndaşımız sağlığında orqan bağışlanmasına razılıq verib. Bu ilin fevral ayında da oxşar bir hadisə baş verib. Beyin ölümü diaqnozu qoyulan bir vətəndaşın qaraciyəri Mərkəzi Gömrük Hospitalında Dr. Kazıminin rəhbərliyi ilə, canlı donoru olmayan, qaraciyər sirrozundan əziyyət çəkən 2002-ci il təvəllüdlü Şərifova Mənzər Yaşar qızına köçürülüb. Bu əməliyyat sağlamlıq sahəsindəki irəliləyişin ən bariz göstəricisidir.