Dünya çempionu dələduzluğa görə yarışlardan kənarlaşdırılıb

Fransalı biatlonçu, dünya çempionu Jüli Simon dələduzluq ittihamlarına görə bütün yarışlardan uzaqlaşdırılıb. Bu qərarı Fransa Xizək İdmanı Federasiyasının (FFS) İntizam Komitəsi açıqlayıb.

İdmançı beş ayı şərti olmaqla, altı ay müddətinə yarışlardan kənarlaşdırılıb. Onun cəzası artıq qüvvəyə minib; cəzanın tətbiqinə noyabrın 7-də başlanılıb. Bu ciddi sanksiya 29 yaşlı biatlonçuya qarşı irəli sürülən dələduzluq hərəkətləri ilə bağlıdır.

Simonun cinayət əməlləri 2021-2022-ci illər arasında baş verib. O, onlayn alış-veriş üçün ödəniş etmək məqsədilə Fransa milli komandasındakı iki komanda yoldaşının bank kartını oğurlayıb. Bu hadisələrə görə o, bu ilin oktyabrında məhkəmə tərəfindən üç aylıq şərti həbs cəzası alıb. Əlavə olaraq, biatlonçu 15 min avro məbləğində də cərimələnib.

Qeyd edək ki, J. Simon biatlon üzrə yüksək nailiyyətləri olan idmançıdır. O, estafet yarışları üzrə 10 qat dünya çempionudur. Buna baxmayaraq, federasiya onun dələduzluq səbəbindən yarışlardan kənarlaşdırılması qərarını təsdiqləyib.