Əl Şaraa: Suriyada prezident seçkiləri dörd ildən sonra keçiriləcək

Suriyanın keçid dövrü prezidenti Əhməd Əl Şaraa ölkədə prezident seçkilərinin keçirilmə müddəti barədə məlumat verib. O, Dohada keçirilən forumda bildirib ki, seçkilər dörd ildən sonra, yeni konstitusiyaya əsasən baş tutacaq. Əhməd Əl Şaraa bu qərarın milli dialoq üzrə keçirilmiş konfransın nəticəsi olduğunu qeyd edib. Həmin konfransda müvəqqəti konstitusiya bəyannaməsi qəbul edilib.

Bu bəyannamə hazırkı prezidentə beş il müddətində hakimiyyətdə qalmaq səlahiyyəti verdi. Suriya liderinin sözlərinə görə, bu beş illik müddət çox vacibdir, çünki ölkənin dövlət idarəetmə sistemi üçün əsas prinsip olacaq konstitusiya hazırlanmalıdır. Eyni zamanda, bu dövr ərzində bir çox zəruri qanunlar qəbul ediləcək. Əl Şaraa prosesin gecikmə səbəbini izah edərkən, bu müddətin keçid dövrü ilə bağlı olduğunu vurğulayıb. O, prosesin mürəkkəbliyi və xarakteri səbəbindən daha çox vaxt tələb etdiyini deyib.

Lider dörd ildən sonra mütləq seçkilərin keçiriləcəyini təsdiqləyib. Əl Şaraa onu da əlavə edib ki, keçid hökuməti ölkənin üzləşdiyi ağır şəraitə baxmayaraq, parlament seçkilərini artıq təşkil edib. Bu proses mövcud vəziyyətə uyğun olaraq həyata keçirilib. Gələcək prezident seçkiləri də yeni qanunvericilik bazası hazır olduqdan sonra, qeyd olunan dörd ildən sonra keçiriləcək.