Gürcüstanda azərbaycanlı kriminal avtoritetin qətl sifarişinə görə daha 2 nəfər saxlanılıb

Gürcüstanın Kvemo Kartli bölgəsində daha iki nəfər cinayət məsuliyyətinə cəlb edilib. Onlar adam öldürməyə cəhd, həmçinin qanunsuz odlu silah almaq, saxlamaq və gəzdirməkdə ittiham olunurlar. Bu barədə məlumatı Gürcüstan Daxili İşlər Nazirliyi yayıb. İstintaq materialları göstərir ki, bütün bu hadisələr kriminal avtoritet Elmuraz Məmmədovun sifarişi ilə həyata keçirilib. Oktyabr ayında Məmmədov xaricdə olmasına baxmayaraq, sosial şəbəkə üzərindən Qardabani kəndlərindən birində yaşayan fermer S.A. ilə əlaqə yaradıb. O, "oğru dünyası" adından fermerdən 200 min ABŞ dolları məbləğində pul tələb edib.

Məmmədov fermerə pulu ödəməsi üçün üç gün vaxt verib. O, əks halda S.A.-nın ailə üzvlərinin həyatına son qoyulacağını bildirərək hədələyib. Üç günlük müddət bitəndən sonra naməlum şəxslər S.A.-nın oğluna atəş açıblar. Bu hadisə oğul kənddə avtomobili ilə hərəkət edərkən baş verib, xoşbəxtlikdən xəsarət alan olmayıb. Polis hazırda bu cinayətdə iştirak edən daha bir şəxsi axtarır. Törədilmiş əmələ görə cəza 15 ilədək həbslə nəzərdə tutulur. Kvemo Kartli bölgəsində əməliyyat tədbirləri davam edir, bu son həbslər məhz həmin araşdırmanın nəticəsidir.

Bu, Elmuraz Məmmədovun adının hallandığı yeganə cinayət işi deyil. Ötən gün Marneulidə də onunla əlaqəli olan iki nəfər saxlanılıb. Həmin şəxslər 50 min ABŞ dolları köçürməkdən imtina edən bir iş adamının avtomobil ehtiyat hissələri mağazasının fasadına atəş açmışdılar. Həmçinin, cəmi iki gün əvvəl Qabal kəndində 18 yaşlı bir gənc tutulub. O, Məmmədova 200 min ABŞ dolları ödəməkdən imtina edən şəxsi qətlə yetirmək tapşırığı almışdı, lakin bu sifarişi yerinə yetirə bilməmişdi. Hazırda Elmuraz Məmmədovun özü xaricdədir və beynəlxalq axtarışdadır, İnterpolun "qırmızı xətti" ilə axtarılır.