HƏMAS Netanyahunu Qəzza razılaşmasını pozmaqda ittiham edib

Fələstinin HƏMAS hərəkatı İsrailin baş naziri Benyamin Netanyahunu Qəzza zolağında əldə edilmiş atəşkəs razılaşmasını pozmaqda ittiham edib. Hərəkat öz bəyanatında bildirir ki, İsrail baş nazirinin atdığı addımlar razılaşmanı kobud şəkildə pozur.

HƏMAS-ın sözlərinə görə, İsrailin baş naziri Misirlə Qəzza zolağı arasındakı "Rəfah" buraxılış məntəqəsini açmaqdan imtina edib. Təşkilat bu imtinanı atəşkəs razılaşmasının pozulması və İsrailin vasitəçilər qarşısında götürdüyü öhdəliklərin "inkarı" hesab edir. Rəfahın davamlı olaraq bağlı qalması ciddi humanitar və texniki problemlər yaradır.

Nəzarət-buraxılış məntəqəsinin bağlanması yaralıların ölkəni tərk etməsinin qarşısını alır. Bundan başqa, məhbusların cəsədlərini axtarmaq üçün zəruri olan texnikanın və ixtisaslaşmış qrupların Qəzzaya daxil olmasına da mane olur. Hərəkat vurğulayır ki, bu vəziyyət ölənlərin cəsədlərinin axtarışı və qaytarılması prosesini ləngidəcək. Benyamin Netanyahu hökumətinin Rəfah məsələsindəki mövqeyi gərginliyi artırır.