Hərbi parad Azərbaycan-Türkiyə-Pakistan həmrəyliyin nümayişi idi - RƏY

Vətən müharibəsinin beşinci ildönümünə həsr olunan hərbi parad Azərbaycanın suverenliyinin və ərazi bütövlüyünün bərpasının rəmzi idi. Bu mühüm hadisə eyni zamanda üç qardaş ölkə - Azərbaycan, Türkiyə və Pakistan arasında olan sarsılmaz mənəvi dəstəyin və həmrəyliyin açıq nümayişi oldu. Siyasi şərhçi Ülviyyə Zülfiqar bildirib ki, paradda Türkiyə və Pakistanın iştirak etməsi dərin tarixi və strateji köklərə əsaslanan qardaşlıq münasibətlərinin təzahürüdür. Bu, regionda formalaşan yeni siyasi nizam üçün çox vacib əhəmiyyət daşıyır.

Zülfiqar 44 günlük Vətən müharibəsi dövründə qardaş Türkiyənin göstərdiyi mənəvi dəstəyi və könül həmrəyliyini xüsusi qeyd etdi. O, bu dəstəyin “iki dövlət, bir millət” prinsipinin real mənasını sübutlarla bütün dünyaya göstərdiyini vurğuladı. Türkiyə ilə Azərbaycan arasındakı bənzərsiz tarixi qardaşlıq münasibətləri bütün istiqamətlərdə davam edir. Eyni zamanda, Pakistanın mövqeyi də diqqət çəkicidir; bu ölkə illərlə Azərbaycanın ədalətli mövqeyini prinsipial şəkildə müdafiə edib. Pakistan Ermənistanı tanımayan azsaylı ölkələrdən biri kimi səmimi həmrəyliyini qoruyub. Şərhçi qeyd edir ki, bu mənəvi dəstək Azərbaycanın xarici siyasətində qardaşlıq diplomatiyasının strateji önəmini daha da artırır.

Siyasi şərhçi əlavə etdi ki, paradda üç ölkənin hərbçilərinin birgə addımlaması ortaq dəyərlərin, həm tarix, həm də gələcək baxımından birləşməsi deməkdir. Bu mənzərə ilə dünyaya açıq bir mesaj çatdırılır: bölgədə ədalət, sabitlik və sülh yalnız dostluq və qardaşlıq zəminində qurulur. Türkiyə və Pakistanın paradda iştirakı Azərbaycanın regionda yaratdığı yeni siyasi və mənəvi nizamın ayrılmaz bir hissəsidir. Bu iştirak, həm də üç ölkə arasında strateji birliyin nə qədər dərin olduğunu bir daha təsdiqləyir.