Hərbi Prokurorluq bir sıra cinayətlərdə ittiham olunan zastava rəisi barədə qərardan şikayət verib - YENİLƏNİB

Cəlilabad Hərbi Məhkəməsi bir sıra cinayətlərdə ittiham olunan sabiq zastava rəisi Mahmud Səfəralıyev barədə verilən qərar və Hərbi Prokurorluq tərəfindən verilən şikayətə münasibət bildirib. Məhkəmə noyabrın 27-də təqsirləndirilən şəxsin barəsində həbs qətimkan tədbirinin seçilməsinə dair təqdimata baxış keçirdi. Mahmud Səfəralıyev Dövlət Sərhəd Xidmətinin hərbi hissəsinin hərbi qulluqçusu, kapitan rütbəsini daşıyır və Cinayət Məcəlləsinin 329.2.1, 329.2.2 və 329.3-cü maddələri ilə təqsirləndirilir. Məhkəmə təqdimatı rədd etdi, çünki qanunda nəzərdə tutulmuş prosessual əsaslar müəyyən edilməmişdi. Nəticədə, kapitan M.H.Səfəralıyev dərhal məhkəmə iclas zalında həbsdən azad edildi.

Məhkəmə qeyd edir ki, qəbul edilmiş bu qərar iş üzrə yekun qərar sayılmır. Şəxsin təqsirlilik məsələsi prosessual məcburiyyət tədbirinin tətbiqi ilə bağlı məsələyə baxılarkən həll olunmur. Kapitan Səfəralıyev Biləsuvarda əsgərin intiharı ilə bağlı hadisədə günahlandırılırdı. İttiham sənədlərinə görə, o, xidməti zamanı Dövlət Sərhəd Xidmətinin Biləsuvarda yerləşən hərbi hissəsinin əsgəri H.H. və başqa bir neçə əsgərə qarşı çoxsaylı təhqir və zorakılıq hallarına yol verib. Bu hadisələrin ardından əsgər H.H. bu il noyabrın 15-də intihar etmişdi. Kapitan Səfəralıyev əsgərlərə qarşı qanunsuzluğa yol verdiyinə görə daha əvvəl vəzifəsindən azad olunmuşdu.

Hərbi Prokurorluq bu faktla bağlı istintaq apardı və kapitan Mahmud Səfəralıyevin törətdiyi əməlləri sübut edib, barəsində cinayət işi açdı. Onun barəsində həbs qətimkan tədbiri seçilməsi üçün Cəlilabad Hərbi Məhkəməsinə təqdimat göndərilsə də, məhkəmə bunu təmin etmədi. Hərbi Prokurorluq məhkəmənin qərarından şikayət verib. Prokurorluq Mahmud Səfəralıyevin azadlıqda qalmasının həm cəmiyyətdə mənfi emosiya doğuracağını, həm də mərhum əsgərin yaxınları tərəfindən ciddi narazılığa səbəb olacağını bildirir. Şikayətə Şirvan Apellyasiya Məhkəməsində baxılacaq.