Kiberhücumlardan dezinformasiyaya qədər: Müasir müharibənin yeni cəbhələri (FOTO/VİDEO)

“Baku Network" Təhlil və Araşdırmalar İctimai Birliyinin "Azərbaycan əleyhinə Hibrid və ideoloji təhdidlərin təhlili" layihəsi üzrə növbəti onlayn görüşü keçirilib. Bu müzakirə Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə baş tutub. Debatın moderatoru Elnur Ənvəroğlu olub, qonaq qismində isə Böyük Britaniyadan fəlsəfə doktoru, BBC-nin keçmiş əməkdaşı Devid Uilyam Parri qatılıb. Əsas mövzu müasir müharibənin – hibrid müharibənin yeni cəbhələri və onun dövlətlərə təsiri olub.

Müzakirələr zamanı qeyd edildi ki, ABŞ Hərbi Dəniz Qüvvələrinin zabiti və Pentaqon analitiki Frenk Hoffmanın irəli sürdüyü “Hibrid müharibə” anlayışı bu gün öz mahiyyətini tam şəkildə göstərir. Hoffmanın dediyinə görə, bu müharibə tək bir cəbhədə deyil, bir neçə yerdə aparılır və insan intuisiyasının asanlıqla yan keçə biləcəyi bir çox taktiki və texniki elementləri gizlədir. Sürətli texnoloji tərəqqi fonunda hibrid müharibə ənənəvi döyüş meydanlarından uzaqlaşıb. O, indi kölgələrdə, yəni kiberməkanda, sosial mediada, xəbər otaqlarında və hətta ictimai fikrin formalaşdığı yerlərdə aparılır.

Debatın qonağı Dr. Perrinin fikrincə, hibrid müharibə görünməz olsa da, çox dağıdıcı təsirə malikdir. Bəzən qan tökülmədən baş verir, lakin bütöv dövlətləri içəridən sarsıtmaq gücündədir. Ənənəvi müharibələrdən fərqli olaraq, hibrid müharibə hərbi təcavüzü iqtisadi təzyiq, dezinformasiya, siyasi manipulyasiya, kiberhücumlar və proksi əməliyyatlarla birləşdirir. Bu strategiya orduları hədəf almır, əksinə, ölkələrin zəif nöqtələrini nişan alır. O, cəmiyyətdəki bölünmələri dərinləşdirir, etimadı sarsıdır və bir güllə belə atmadan idarəetmə strukturlarını zəiflədərək sabitliyi pozur. Mütəxəssislərin analizi müasir dövlətlərin bu yeni, daha qeyri-müəyyən təhdidlərə qarşı yeni müdafiə üsulları hazırlaması lazım olduğunu göstərir.