Lökbatanda yanğında 4 nəfər ölüb, 2-si uşaqdır - FOTO - YENİLƏNİB 4

Bakının Qaradağ rayonu, Lökbatan qəsəbəsi, "Qobu Park 1" yaşayış massivində baş verən yanğın faciə ilə nəticələndi. 05 dekabr 2025-ci il tarixində, təxminən saat 03:15 radələrində partlayış baş verməsi səbəbi ilə Respublika Təcili və Təxirəsalınmaz Tibbi Yardım Mərkəzinə çağırış daxil oldu. Dərhal 12 təcili tibbi yardım briqadası hadisə yerinə cəlb edildi. TƏBİB-in Mətbuat xidmətinin məlumatına görə, tibb işçiləri hadisə yerində 4 nəfərin həkiməqədər ölüm faktını qeydə aldılar. İlkin diaqnozla, ölən şəxslər tüstüdən zəhərlənmişdi. Bundan başqa, dörd qadın tüstüdən zəhərlənmə diaqnozu ilə Kliniki Tibbi Mərkəzə hospitalizasiya olundu.

Fövqəladə Hallar Nazirliyinin (FHN) "112" qaynar telefon xəttinə məlumat daxil olduqdan sonra Dövlət Yanğından Mühafizə və Xüsusi Riskli Xilasetmə xidmətlərinin qüvvələri əraziyə cəlb olundu. Yanğın doqquzmərtəbəli binanın yeddinci mərtəbəsində yerləşən ikiotaqlı mənzildə baş vermişdi. Yanğınsöndürənlər alovun genişlənməsinə, o cümlədən digər mənzillərə keçməsinə imkan vermədən qısa müddətdə onu söndürdülər. Yanğın nəticəsində ümumi sahəsi 45 m² olan mənzilin mətbəxinin və dəhlizinin yanar konstruksiyaları 13 m² sahədə yansa da, mənzilin qalan hissəsi yanğından mühafizə olundu. Təhlükəsizlik tədbirləri çərçivəsində bina sakinləri təxliyə edildi. Kliniki Tibbi Mərkəzə yerləşdirilən 4 nəfərdən üçünün vəziyyəti orta ağır qiymətləndirilir. Digər bir nəfərə zəruri tibbi yardım göstərildi və o, ambulator müalicə üçün evə buraxılması nəzərdə tutuldu.

Baş Prokurorluğun Mətbuat xidməti yanğınla bağlı əlavə məlumat verərək, hadisənin təfərrüatlarını açıqladı. Qurum tüstüdən boğularaq ölənlərin sayının dörd nəfər olduğunu və onlardan ikisinin azyaşlı uşaq olduğunu təsdiqlədi. Baş Prokurorluğun Kriminalistika və informasiya texnologiyaları idarəsinin əməkdaşları Fövqəladə Hallar Nazirliyinin əməkdaşları ilə birgə hadisə yerini araşdırır. Yanğının baş vermə səbəbini müəyyən etmək üçün müvafiq istintaq hərəkətləri keçirilir və ekspertizalar təyin olunur. Faktla bağlı araşdırma davam edir. Qaradağ rayonundakı bu faciəvi hadisə ilə bağlı araşdırmanın nəticəsi barədə ictimaiyyətə əlavə məlumat veriləcək.