Məmməd Əhmədzadə: Şəhərsalma təcrübəsi Azərbaycan-Niderland əməkdaşlığı üçün möhkəm zəmin yaradır

Azərbaycanın Niderlanddakı səfiri Məmməd Əhmədzadə şəhərsalma təcrübəsi və ortaq məqsədlərin iki ölkə arasındakı əməkdaşlığa möhkəm zəmin yaratdığını vurğulayıb. Səfirin "Diplomat Magazine" jurnalında yayımlanan məqaləsi Azərbaycanın şəhərsalma və memarlıq sahəsindəki inkişaf təcrübəsindən bəhs edir. Bu yazı 2026-cı ildə Bakıda keçiriləcək Ümumdünya Şəhərsalma Forumu (WUF13) ilə əlaqədar hazırlanıb.

Məqalədə Azərbaycanın urban transformasiyasının parlaq nümunələri təqdim edilib. Bunlara Bakı bulvarı boyunca həyata keçirilən yaşıllaşdırma layihələri daxildir. Həmçinin, keçmiş sənaye zonasının ekoloji reabilitasiyasını əhatə edən "Ağ Şəhər" layihəsi də xüsusi qeyd olunub. Müasir yaşayış, turizm və ekoloji dayanıqlılıq prinsiplərini birləşdirən "Sea Breeze" layihəsi də Azərbaycanın bu sahədəki irəliləyişlərini əks etdirir. Bu layihələr ölkənin şəhər inkişafına necə yanaşdığını göstərir, lakin hazırda şəhərsalma prosesində əsas diqqət işğaldan azad olunmuş ərazilərin bərpası və yenidən qurulmasına yönəlib.

"Böyük Qayıdış" proqramı çərçivəsində bu ərazilərdə ağıllı, dayanıqlı və ekoloji təmiz şəhər və kəndlər salınır, müasir infrastruktur qurulur. Zəngilanın Ağalı kəndində tətbiq edilən "ağıllı kənd" konsepsiyası bu sahədəki ilk təcrübələrdən biri kimi xüsusi qeyd olunub. Azad edilmiş ərazilərin ölkənin iqtisadi və sosial həyatına inteqrasiyası üçün mühüm infrastruktur layihələri reallaşdırılıb. Füzuli, Zəngilan və Laçın aeroportlarının, minlərlə kilometr uzunluğunda yeni magistral yolların və dəmir yolu xətlərinin, müasir tunel və körpülərin inşası bu işlərə misaldır. Şuşa şəhərinin yenidən qurulması da mədəni irsin bərpasına yönəlmiş ən önəmli addımlardan biri hesab edilir.

Səfirin məqaləsi Azərbaycan və Niderland arasında şəhərsalma sahəsindəki ortaq baxışları və əməkdaşlıq imkanlarını da işıqlandırır. Azərbaycan orta əsr qala-şəhərlərindən tutmuş müasir "ağıllı" kənd və şəhərlərinə qədər davamlı və çevik inkişaf təcrübəsinə malikdir. Niderland isə öz növbəsində davamlı urbanizasiya və su idarəçiliyi sahəsində böyük qlobal təcrübəyə sahibdir. Hər iki dövlət ekoloji dayanıqlılıq, məkan planlaşdırması və inklüziv yaşayış siyasəti kimi eyni məqsədləri bölüşür. Bu ortaq maraqlar və təcrübələr gələcək əməkdaşlıq üçün güclü zəmin yaradır.