Müəllimlərin kəndlərə getməsi üçün diqqəti cəlb edən güzəştlərə ehtiyac var – Komitə sədri

Milli Məclisin Elm və təhsil komitəsinin sədri Anar İsgəndərov bildirib ki, pedaqoji təhsilli gənclərin kənd məktəblərinə cəlb edilməsi üçün təkcə təbliğat yetərli deyil. O, parlamentin plenar iclasında "Azərbaycan Respublikasının 2026-cı il dövlət büdcəsi haqqında" qanun layihəsinin müzakirəsi zamanı çıxış edib. İsgəndərov qeyd edib ki, gənc mütəxəssislərin kəndlərə getməsi üçün daha diqqəti cəlb edən güzəştlərə ehtiyac var.

Dövlət büdcəsi layihəsinə əsasən, pedaqoji profilli ali və orta ixtisas təhsil müəssisələrini bitirmiş 9,9 min nəfərdən çox gənc mütəxəssisin kənd məktəblərində işə cəlb edilməsi planlaşdırılır. Bu məqsədlə 2,1 milyon manat vəsait nəzərdə tutulub. Bu maliyyə dəstəyi mütəxəssislərin yol xərclərini, əmlakın daşınması üçün nəqliyyat xərclərini və ilkin yaşayış şəraitinin yaradılması üçün birdəfəlik ödənişləri əhatə edir. Bu vəsait, gənc kadrların kənd yerlərinə yerləşməsi üçün ilkin maddi baza yaratmalıdır.

Komitə sədri eyni zamanda kəndlərdə müşahidə edilən demoqrafik problemlərə toxundu. O bildirdi ki, hər il dağlıq rayonlarında şagirdlərin sayı azalır. Bunun əsas səbəbi isə ailələrin fərqli səbəblərdən kəndləri tərk etməsidir. Anar İsgəndərov vurğuladı ki, bu tendensiyanın qarşısını almaq üçün köklü qərarların qəbul edilməsinə ehtiyac var. Pedaqoji təhsilli gənclərin kənd rayonlarına göndərilməsinə mane olan bütün səbəblər aradan qaldırılmalıdır. Yalnız bu maneələr aradan qaldırıldıqda və cəlbedici şərtlər təklif edildikdə gənc kadrların kənd məktəblərinə axını təmin edilə bilər. Kəndlərdə məktəblərin fəaliyyəti bu qərarlardan birbaşa asılıdır.