Naxçıvanda TDT ölkələri QHT-lərinin Həmrəylik Forumu keçirilib - YENİLƏNİB

Türk Dövlətləri Təşkilatına (TDT) üzv ölkələrin qeyri-hökumət təşkilatlarının (QHT) Həmrəylik Forumu Naxçıvan şəhərində işini yekunlaşdırıb. Azərbaycanın təşəbbüsü ilə başlayan forum əvvəlcə Bakıda keçirilib, daha sonra noyabrın 25-də Naxçıvanda davam edib. Bu tədbir çərçivəsində TDT-yə üzv ölkələrin QHT-lərinin Platforması təsis ediləcək. Məlumatlara görə, TDT-yə üzv ölkələrin ictimai təşkilatlarını birləşdirən bu yeni Platformaya Azərbaycan rəhbərlik edəcək. Forumda rəsmi çıxışlar dinlənilib, həmçinin "WUF13-ə doğru - Türk dünyasında ilk" mövzusunda panel müzakirə təşkil edilib.

Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Ceyhun Cəlilov tədbirin rəmzi mənasını vurğulayıb. O qeyd edib ki, 2009-cu ildə "Naxçıvan Sazişi"nin imzalandığı şəhərdə TDT ölkələri QHT-lərinin Həmrəylik Forumunun keçirilməsi böyük önəm daşıyır. Muxtar respublikanın vətəndaş cəmiyyəti nümayəndələri türk dövlətləri ilə əməkdaşlığı genişləndirməkdə xüsusi maraq göstərirlər. Naxçıvan QHT-ləri regional təşəbbüslərə qoşulmağa, ortaq layihələrdə iştirak etməyə və Türk dünyasının birliyinə öz töhfələrini verməyə böyük həvəs göstərirlər.

Azərbaycan Respublikasının QHT-lərə Dövlət Dəstəyi Agentliyinin icraçı direktoru Aygün Əliyeva salamlam nitqi ilə çıxış edərkən son illərdə türk dövlətləri ilə birgə layihələrin silsilə xarakter aldığını bildirib. O, son üç il ərzində Özbəkistan, Türkiyə, Şimali Kipr Türk Respublikası və digər qardaş türk dövlətlərində fəaliyyət göstərən QHT-lər və tərəfdaş qurumlarla bir sıra vacib layihələrin həyata keçirildiyini qeyd etdi. A. Əliyeva bu işlərə misal olaraq Azərbaycan-Türkiyə, Azərbaycan-Özbəkistan, Özbəkistan-Azərbaycan formatlarında baş tutan QHT-lərin əməkdaşlıq forumlarını və COP29 çərçivəsində Bakıda keçirilən "Türk Dövlətlərinin Vətəndaş Cəmiyyəti forumu"nu göstərdi. Direktur həmçinin dünən ilk dəfə "Azərbaycan-Qazaxıstan QHT-lərinin I Əməkdaşlıq Forumu"nun keçirildiyini və gələcəkdə bu formatda ikinci forumu Qazaxıstanda reallaşdırmağa ümid etdiyini əlavə edib. Forum panel müzakirələrlə başa çatıb.