Nazir: Vaşinqton Bəyannaməsi regionda sülh prosesinin irəlilədilməsində əhəmiyyətli mərhələdir

Azərbaycan xarici işlər naziri Ceyhun Bayramov bəyan edib ki, Vaşinqtonda avqustun 8-də imzalanmış Birgə Bəyannamə və əldə olunan digər tarixi razılıqlar regionda sülh prosesinin irəlilədilməsində əhəmiyyətli mərhələdir.

Nazir bu bəyanatı Birləşmiş Millətlər Təşkilatının (BMT) 80 illik yubileyinə həsr olunmuş tədbirdəki çıxışı zamanı səsləndirib. Onun sözlərinə görə, bu razılaşmalar Cənubi Qafqazda sabitlik mühitinin yaranmasına müsbət təsir göstərəcək.

Bayramov çıxışında Azərbaycanın ərazi bütövlüyünü bərpa etməsindən sonra işğaldan azad edilmiş ərazilərdə aparılan genişmiqyaslı bərpa və yenidənqurma işlərini diqqətə çatdırıb. O, həmçinin Cənubi Qafqazda sabitlik və əməkdaşlıq mühitinin yaradılması istiqamətində atılan mühüm addımlar barədə məlumat verib.