Ödənişli yolda quraşdırılan radarlar “ağıllı nəzarət sistemi” ilə işləyəcək (FOTO)

Bakı-Quba-Rusiya ilə dövlət sərhədi yeni avtomobil yolunda yeni radarlar və müşahidə kameraları quraşdırılıb.

Bu qurğular ən müasir "ağıllı nəzarət sistemi" əsasında işləyir. Bu sistem köhnə sürət ölçən cihazlardan fərqlənir, çünki onun əsas funksiyası yol təhlükəsizliyini artırmaq və sürücülərin cərimələrdən yayınma hallarının qarşısını almaqdır. Hazırda radarlar və müşahidə kameraları test rejimində çalışır. Daxili İşlər Nazirliyinin müvafiq qurumu bütün prosesi həyata keçirir.

Yeni texnoloji vasitələr bir-biri ilə real vaxtda məlumat mübadiləsi aparır. Bu, eyni yol xəttində ardıcıl yerləşdirilən radarlar arasında məsafənin nəzarətə alınması deməkdir. Əgər sürücü həmin iki nöqtə arasındakı müəyyən edilmiş sürət həddini aşarsa, sistem bunu dərhal qeydə alır. Ağıllı radarlar avtomobilin həmin marşrut boyu orta sürətini hesablaya bilir. Nəticədə, sürücülər yalnız radarın qarşısından keçərkən deyil, bütün hərəkət trayektoriyası boyunca təyin edilmiş maksimal sürət həddinə əməl etməlidirlər. Sistemin əsas məqsədi yol təhlükəsizliyini yüksəltmək və sürətin süni şəkildə azaldılıb-artırılması ilə cərimələrdən yayınma hallarının qarşısını kəsməkdir.

Bu texniki vasitələr hazırda sınaq müddətini keçir. Test başa çatandan sonra, radarlar tam funksional şəkildə işə düşəcək və qayda pozuntularını avtomatik olaraq qeydə alacaq. Rəsmi qurumlar sürücülərə xəbərdarlıq edərək bildirir ki, yeni sistem təhlükəsizliyin təmin olunması üçün nəzərdə tutulub və hərəkət zamanı yol nişanlarına ciddi riayət edilməlidir. Bakı-Quba-Rusiya ilə dövlət sərhədi avtomobil yolunun 129 kilometrlik ödənişli hissəsində 20-yə yaxın məntəqədə radarlar və xüsusi texniki vasitələrin quraşdırılması nəzərdə tutulur.

Hazırda yolda ən yüksək sürət həddi qanunvericiliyə uyğun olaraq 110 km/saat təşkil edir. Yolun başlanğıc nöqtəsi Yeni Yaşma, son nöqtəsi isə Yeni Sudur ödəmə məntəqəsidir. Bütün yol boyu sürət həddini göstərən nişanlara rast gəlmək mümkündür. Ödənişli yolda maksimal sürət həddi, radar və müşahidə kameralarını göstərən yol nişanları bu ilin yanvar ayında quraşdırılmışdı. Qeyd etmək lazımdır ki, ödənişli yolda sürət həddinin artırılması ilə bağlı təkliflər də müzakirə edilir.