PA-nın sektor müdiri: Mediada xarici sözlərin yersiz işlədilməsi gənclərin dil mühitinə mənfi təsir edir

Azərbaycan dilinin saflığının qorunması məsələsi dövlət rəhbərliyi üçün olduqca önəmlidir. Prezident İlham Əliyevin bu sahədəki dəyərli fikirləri və məsələni 10 il sonra yenidən gündəmə gətirməsi, dövlətin dilin qorunmasına necə həssas yanaşdığını göstərir. Bütün bu diqqətə baxmayaraq, Kamran Həsənovun sözlərinə görə, son on ildə görülən işlər vəziyyətin hələ də tam qənaətbəxş olmadığını deməyə əsas verir. Prezident Administrasiyasının Qeyri-hökumət təşkilatları ilə iş və kommunikasiya şöbəsinin Media ilə iş sektorunun müdiri Kamran Həsənov bu fikirləri “Mediada Azərbaycan ədəbi dilinin normalarının düzgün tətbiqi” mövzusunda keçirilən konfransda səsləndirib.

K. Həsənov ədəbi dilin qorunması üçün atılan bir çox addımları qeyd etdi. Bu müddət ərzində Azərbaycan qanunvericilik bazasını təkmilləşdirdi. 2002-ci ildə Azərbaycan Respublikasının “Dövlət dili haqqında” Qanunu qəbul edildi. Bu qanun dilin xarici təsirlərdən mühafizəsi və saflığının qorunması üçün hüquqi çərçivə yaratdı. Dövlət proqramları və tədbirlər planları çərçivəsində Azərbaycan dilinin düzgün istifadəsinin təşviqi və buna nəzarətlə bağlı fərqli qərarlar verildi. Həmçinin, məktəb və universitetlərdə Azərbaycan dilinin ədəbi normalarının öyrədilməsinə xüsusi diqqət yetirilir.

Sektor müdiri Azərbaycan dilinin qlobal platformalarda təbliğinin yüksək səviyyədə dəstəkləndiyini söylədi. Lakin o vurğuladı ki, dil qloballaşma, texnoloji inkişaf və xarici təsirlər kimi çətinliklərlə üz-üzədir. Qloballaşma bugünkü reallıqdır və digər sahələrə təsir etdiyi kimi, dilin özünəməxsusluğunun qorunmasına da təsir edir. Kamran Həsənov qloballaşma ilə dilin saflığının qorunması arasında balans yaratmaq mümkün olduğunu düşünür. Yeni terminlər dilimizə zərər verə bilər, amma əksinə, onu zənginləşdirə də bilər.

O, medianın rolunu xüsusi qeyd etdi. Onun sözlərinə görə, mediada xarici sözlərin yersiz işlədilməsi ədəbi dilin normalarını pozur və gənclərin dil mühitinə mənfi təsir göstərir. Buna görə də, yeni terminlərin dilə gətirilməsində, həmçinin dilin orijinallığının və zənginliyinin qorunmasında medianın və jurnalistlərin üzərinə böyük məsuliyyət düşür.