Premyer Liqa: "Sumqayıt" "Araz-Naxçıvan"ı məğlub edib

Misli Premyer Liqasında X turun daha bir oyunu yüksək gərginliklə yadda qaldı. Günün ikinci matçında "Sumqayıt" futbol klubu öz meydanında "Araz-Naxçıvan"ı qəbul etdi. Qarşılaşma meydan sahiblərinin 3:2 hesablı qələbəsi ilə yekunlaşdı. Bu qələbə ilə "Sumqayıt" çempionat cədvəlində yerini möhkəmləndirdi.

Qarşılaşmada "Gənclik şəhəri" təmsilçisinin heyətində Roi Kehat iki dəfə fərqləndi. O, 17-ci və 78-ci dəqiqələrdə rəqib qapısına yol tapdı. Digər qolu isə 69-cu dəqiqədə Ronaldo Vaskez vurdu. Naxçıvan klubunun cavab qollarına gəldikdə, 41-ci dəqiqədə Şarl Boli, 50-ci dəqiqədə isə Patrik Andrade qol müəllifi oldu.

Bu nəticə çempionat cədvəlinə təsir göstərdi. Xallarının sayını 17-yə çatdıran "Sumqayıt" dördüncü pilləyə yüksəldi. "Araz-Naxçıvan" isə 16 xalla beşinci sıradadır. Turun ilk matçında "Turan Tovuz" evdə "Şamaxı"nı 2:1 hesabı ilə üstələmişdi. Əvvəlki oyunlarda isə "Qarabağ" "İmişli"ni (2:0), "Zirə" "Karvan-Yevlax"ı (3:2), "Neftçi" isə "Kəpəz"i (5:1) məğlub etmişdi. Tura noyabrın 3-də keçiriləcək "Sabah" - "Qəbələ" qarşılaşması ilə yekun vurulacaq.