Premyer Liqa: "Zirə" "Sumqayıt"ı məğlub edib

Misli Premyer Liqasında IX turun daha bir oyunu baş tutdu. Günün ikinci matçı "Zirə" və "Sumqayıt" komandaları arasında keçirildi. Qarşılaşma meydan sahiblərinin qələbəsi ilə yekunlaşdı.

Bu görüşdə tərəflərin vurduğu yeganə qol 37-ci dəqiqədə qeydə alındı. Həmin qolu Bakı klubunun futbolçusu Brahim Konate vurdu. Bu vacib qələbə nəticəsində "Zirə" xallarının sayını 16-ya çatdırdı və liqanın üçüncü pilləsində qərarlaşdı. "Zirə" bununla da Avropa kubokları zonasına yaxınlaşdı. Digər tərəfdən, məğlub olan "Gənclik şəhəri" təmsilçisi "Sumqayıt" 14 xalla altıncı yerdə qaldı.

IX tur çərçivəsində digər maraqlı nəticələr də qeydə alınıb. Günün ilk matçında "Sabah" və "Araz-Naxçıvan" komandaları 2:2 hesabı ilə heç-heçə etdilər. Ötən gün isə iki oyun keçirilmişdi: "Turan Tovuz" "Karvan-Yevlax"ı 2:1, "İmişli" isə "Kəpəz"i 3:0 hesabı ilə məğlub etmişdi. Misli Premyer Liqasının bu turuna yekun oktyabrın 26-da vurulacaq.