Qarabağ layihəsi üçün seysmik tədqiqat proqramına aid Ətraf Mühitə Təsirin Qiymətləndirilməsi sənədinin layihə variantı podratçı tərəflərin adından dərc edilib

BP şirkəti, Xəzər dənizinin Azərbaycan sektorunda Qarabağ yatağının işlənməsi üzrə Risk Xidmət Sazişi əsasında fəaliyyət göstərən əməliyyat şirkəti olaraq, iş proqramının tərkib hissəsi kimi mühüm bir sənədin dərc olunduğunu bildirir. Podratçı tərəflərin adından Qarabağ layihəsi üçün seysmik tədqiqat proqramına aid Ətraf Mühitə Təsirin Qiymətləndirilməsi (ƏMTQ) sənədinin layihə variantı hazırlanıb və ictimaiyyətə təqdim edilib. Bu sənəddə təklif edilən fəaliyyətlərin qısa icmalı verilir, həmçinin bu fəaliyyətlərlə əlaqədar ətraf mühitə və sosial-iqtisadi sahəyə göstərilə biləcək potensial təsirlər araşdırılır.

ƏMTQ prosesinin əsas məqsədi planlaşdırılan işlərin nəticəsində yaranan hər hansı mənfi ekoloji və sosial-iqtisadi təsirlərin müəyyənləşdirilməsini, minimuma endirilməsini və mümkün olan hallarda aradan qaldırılmasını təmin etməkdir. Sənəd həmçinin tövsiyə edilən təsirazaltma və monitorinq tədbirlərini də təsvir edir. Qarabağ layihəsi üzrə seysmik tədqiqat proqramına dənizdibi sensor qovşaqlarla (OBN) seysmik tədqiqat və yüksək dəqiqlikli (HR)/ultra yüksək dəqiqlikli (UHR) seysmik tədqiqat daxildir. Bu iki tip tədqiqat yatağın gələcək planlaşdırılması üçün fərqli, lakin vacib məlumatlar toplayacaq.

Zaman cədvəlinə görə, OBN tədqiqatının 2025-ci ilin dekabrında başlaması və 3.5 ayadək davam etməsi gözlənilir. HR/UHR tədqiqatı isə 2026-cı ilin mart-aprel aylarında həyata keçiriləcək və 45 günədək davam edəcək. OBN seysmik tədqiqat vasitəsilə yataq haqqında daha dərin məlumatlar əldə olunacaq, bu da quyuların planlaşdırılmasına və işlənmə strategiyalarının təkmilləşdirilməsinə şərait yaradır. Digər tərəfdən, HR/UHR tədqiqatının əsas məqsədi quyu bütövlüyünə təsir göstərə biləcək geoloji riskləri, eləcə də platformanın və digər infrastrukturun təhlükəsiz şəkildə quraşdırılmasına maneə törədə biləcək yeraltı təhlükələri müəyyənləşdirməkdir. Maraqlı tərəflərlə məsləhətləşmə aparmaq ƏMTQ prosesinin mühüm hissəsidir; bu proses keyfiyyətli məlumat əldə etmək və tərəflərin birgə fikirlərinin layihələndirmə sənədlərində əks olunması üçün lazımdır.