Qırğızıstanın səfiri: Türk dövlətləri üçün vahid media məkanının formalaşdırılması zəruridir

Qırğız Respublikasının Azərbaycan Respublikasındakı fövqəladə və səlahiyyətli səfiri Maksat Mamıtkanov türk dövlətləri üçün ortaq bir media məkanının qurulmasını zəruri hesab edir. Səfir bu fikri Türk Dövlətləri Təşkilatının (TDT) media və informasiya üzrə məsul nazirlərinin və yüksək vəzifəli rəsmilərinin 7-ci toplantısında dilə gətirib.

Mamıtkanovun sözlərinə görə, bu gün rəqəmsal platformalarda bir sıra çətinliklərlə üzləşirik. Məhz buna görə də vahid media məkanının formalaşdırılması önəmlidir. O qeyd edib ki, belə bir sistemin yaradılması təşkilatın milli informasiya təhlükəsizliyinin inkişafına mühüm töhfə verəcək. Bu görüşlərdə fikir mübadiləsi aparmaqla mühüm qərarlar qəbul etmək mümkün olur. TDT-yə üzv ölkələr müxtəlif sahələrdə artıq ciddi nəticələr əldə ediblər.

Səfir vurğulayıb ki, informasiya sahəsində əməkdaşlıq digər sahələrlə yanaşı olduqca vacibdir. Bu əməkdaşlıq qarşılıqlı məlumat axınlarının yaradılması və effektiv şəkildə həyata keçirilməsini təmin edir. Maksat Mamıtkanov sosial şəbəkələrin bəzən reallıqdan uzaq məlumatlar yaydığını xatırladıb. Buna görə də ölkələr və xalqlar arasında etimadın möhkəmləndirilməsi əsas məsələlərdən biri sayılır. O əlavə edib ki, vahid media sisteminin qurulması ölkələri bu kimi problemlərdən və təhdidlərdən qorumağa imkan verə bilər.