Rəsmi Ankara: Kiprli türklərin rifahına töhfə verməyə davam edəcəyik

Türkiyə Xarici İşlər Nazirliyi Şimali Kipr Türk Respublikasında (ŞKTR) keçirilən prezident seçkilərinin ilkin nəticələri ilə əlaqədar bəyanat yayıb. Rəsmi Ankara ilkin nəticələrə görə ŞKTR Prezidenti seçilən Tufan Erhürmanı təbrik etdi. Nazirlik bu seçkilərin kiprli türklərin azad və suveren iradəsini, həmçinin ŞKTR-dəki dövlət ənənəsini və demokratiya mədəniyyətini əks etdirdiyini vurğuladı.

XİN verdiyi bəyanatda, bu seçkilərin kiprli türklər və bütün ada üçün xeyirli olmasını arzuladı. Bu seçkilər oktyabrın 19-da keçirilib və Tufan Erhürman Cümhuriyyətçi Türk Partiyasının sədri olaraq qələbə qazanıb. Qeyd etmək lazımdır ki, yeni seçilən prezident adada federasiya qurulmasının tərəfdarı kimi tanınır. Ankara verdiyi bəyanatla seçkilərin nəticələrinə hörmət etdiyini nümayiş etdirir.

Türkiyə kiprli türklərin əmin-amanlığı, rifahı və inkişafı üçün göstərilən səylərə töhfə verməyə davam edəcəyini bəyan edib. Nazirlik Türkiyənin bu dəstəyi tarixi, hüquqi və humanitar məsuliyyətləri çərçivəsində, adanın reallıqlarına uyğun şəkildə həyata keçirəcəyini bildirib. Rəsmi Ankara regionda sülhün və inkişafın qorunmasına yönəlmiş siyasətini davam etdirəcəyinə söz verir.