Sinif yoldaşının ölümündə təqsirləndirilən yeniyetməyə hökm oxunub

Bakı Ağır Cinayətlər Məhkəməsində sinif yoldaşının ölümü ilə nəticələnən mübahisədə təqsirləndirilən yeniyetmə M.İ.-nin cinayət işi üzrə proses yekunlaşıb. Hakim Nigar İmanovanın sədrliyi ilə keçirilən məhkəmədə hökm oxunub. Məhkəmənin qərarına əsasən, yeniyetmə təqsirləndirilən şəxs 9 il müddətinə azadlıqdan məhrum edilib. Bu, məktəblilər arasında yaranan münaqişənin ağır və faciəvi nəticəsidir.

Prosesdə təqsirləndirilən şəxsin vəkili çıxış edərək hadisənin təfərrüatlarını və müdafiə mövqeyini açıqlayıb. Vəkil bildirib ki, müvəkkili zərərçəkmiş tərəflə barışmağa çalışıb və onlara mənəvi ziyanın ödənilməsi ilə bağlı təklif verib, lakin buna nail olmayıb. Qeyd edilib ki, tərəflər sinif yoldaşları olub və hadisə futbol oynayarkən baş verib. Müvəkkilin şəxsi öldürmək fikri olmayıb. İ.M. zərərçəkmişə yumruq vurub, o, huşunu itirib. Zərərçəkmiş müdaxilədən sonra ayılıb və evə gedib, lakin hadisədən bir neçə gün sonra dünyasını dəyişib.

Müdafiə tərəfi məhkəmədən bu faktları nəzərə almasını xahiş edib. Vəkil qeyd edib ki, müvəkkili hadisə zamanı affekt vəziyyətində olub. Həmçinin İ.M. yetkinlik yaşına çatmayıb, şəhid ailəsi üzvüdür və indiyə qədər cinayəti olmayıb. Buna görə vəkil məhkəmədən Cinayət Məcəlləsinin tələb etdiyi cəza həddindən aşağı, şərti cəza verilməsini istəyib. İş üzrə təqsirləndirilən İ.M. də son söz olaraq ona ağır cəza verilməməsini xahiş edib. O, Cinayət Məcəlləsinin 126.3-cü (Qəsdən sağlamlığa ağır zərər vurma, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham edilirdi. Buna baxmayaraq, məhkəmə prosesinin yekunu olaraq ona 9 il həbs cəzası kəsilib.