SOCAR reytinq şirkətləri ilə yeni ESG reytinqlərinin əldə edilməsi istiqamətində aktiv danışıqlar aparır

Azərbaycan Dövlət Neft Şirkəti (SOCAR) hazırda reytinq şirkətləri ilə yeni ESG (Ətraf mühit, Sosial və İdarəetmə) reytinqlərini almaq üçün fəal danışıqlar aparır. SOCAR bu addımla alternativ maliyyə resurslarına çıxışı sadələşdirməyi, qlobal kapital bazarlarında əlavə investisiya fondları ilə əməkdaşlıq etməyi hədəfləyir. Şirkət həmçinin "Yaşıl" və "dayanıqlı" maliyyə alətlərindən istifadəni təmin etməyi planlaşdırır. SOCAR Xəzər regionunda ESG meyarları üzrə qiymətləndirmə alan ilk şirkət kimi tanınır. Şirkət MSCI tərəfindən ilkin BBB reytinqinə layiq görülüb. Bu qiymətləndirmə SOCAR-ın əksər milli neft şirkətlərinə nisbətən daha güclü mövqeyə malik olduğunu göstərir.

Qeyd edək ki, "S&P Global Ratings” qlobal kapital bazarlarında kredit keyfiyyəti və risklərin qiymətləndirilməsi sahəsində ən nüfuzlu beynəlxalq reytinq agentliklərindən biridir. Bu şirkətin reytinqləri investorların qərarlarına və maliyyə institutlarının borclanma planlarına birbaşa təsir edir. S&P Global Ratings agentliyi SOCAR-ın uzunmüddətli emitent reytinqini BB səviyyəsinə yüksəltdi. Bu, ötən səkkiz il ərzində SOCAR üzrə qeydə alınan ən yüksək qiymətləndirmədir. Son illərdə enerji bazarlarında müşahidə edilən dəyişkənliklərə baxmayaraq, SOCAR ardıcıl dörd il müsbət sərbəst pul axını, sabit borclanma profili və yüksək likvidlik səviyyəsi ilə fərqlənib. Şirkətin risklərin idarə olunması, əməliyyat dayanıqlılığı və maliyyə qərarlarının icrasındakı yüksək səmərəliliyi bu müsbət nəticələri əldə etməyə imkan verib.

S&P tərəfindən verilmiş "sabit" proqnoz SOCAR-ın mövcud maliyyə göstəricilərini qoruyub-saxlama qabiliyyətinə dair orta və uzunmüddətli dövr üçün müsbət gözləntiləri əks etdirir. Eyni zamanda, borc öhdəliklərinin azaldılması və likvidlik səviyyəsinin qorunması beynəlxalq maliyyə bazarlarında etibarın yüksəlməsini təsdiqləyir. Bütün bunlar SOCAR-ın dayanıqlı maliyyə idarəetməsi strategiyasının effektiv olduğunu göstərir. Bu kompleks tədbirlərin nəticəsində şirkət tarixində ilk dəfə olaraq iki beynəlxalq "investisiya oluna bilən səviyyə" kredit reytinqinə layiq görüldü. Bunlar Fitch Ratings-dən BBB- və Moody’s-dən Baa3 reytinqləridir. Bu nailiyyətlər SOCAR-ın qlobal kapital bazarlarında maliyyə sabitliyinin və etibarlılığının göstəricisidir.

Reytinqin artırılmasını təmin edən vacib xüsusiyyətlər arasında SOCAR-ın maliyyə sabitliyini gücləndirməsi, əməliyyatlarının miqyas və əhəmiyyət baxımından ölkə iqtisadiyyatında əsas rol oynaması daxildir. Həmçinin idarəetmə proseslərində korporativ standartların yüksəldilməsi də mühüm amillərdəndir. Şirkət hazırda bu müsbət dinamikanı qoruyur və digər reytinq şirkətləri ilə yeni ESG reytinqləri əldə etmək üçün danışıqları davam etdirir.