Taleh Kazımov: "Valyuta bazarında nağd və nağdsız seqmentlər üzrə təklif tələbi üstələyib"

Azərbaycan Mərkəzi Bankının (AMB) sədri Taleh Kazımov 2025-ci ilin ötən dövründə valyuta bazarındakı vəziyyət haqqında məlumat verib. O, bu açıqlamanı Milli Məclisin plenar iclasında "2026-cı il dövlət büdcəsi haqqında" qanun layihəsinin I oxunuşda müzakirəsi zamanı səsləndirib. Cənab Kazımov bildirdi ki, bu dövrdə valyuta bazarında həm nağd, həm də nağdsız seqmentlər üzrə təklif tələbi üstələyib. Bu balans qiymət sabitliyinə zəruri dəstək verməyə kömək edib. Tədiyyə balansının cari əməliyyatlar hesabının profisitli qalması, habelə iqtisadi gözləntilərin effektiv idarə olunması valyuta bazarında tarazlığı dəstəkləyən əsas amillər olub.

AMB sədri əlavə etdi ki, bu proseslərlə yanaşı, 2022-ci ildən bəri pul siyasətinin ötürücülüyünün gücləndirilməsi istiqamətində islahatlar həyata keçirilir. Bu islahatlar iqtisadiyyatda dedollarlaşma meyllərini gücləndirdi. Nəticədə, rezident fiziki şəxslərin əmanətlərinin dollarlaşma səviyyəsi ciddi şəkildə azaldı. Bu göstərici ilin əvvəlindən 2,1 faiz bəndi aşağı düşüb. Bu cür dedollarlaşma meylləri Mərkəzi Bankın apardığı siyasətin müsbət nəticəsidir.

Oktyabr ayının yekun nəticələrinə əsasən, əmanətlərin dollarlaşma səviyyəsi 28,5 %-ə düşüb. Taleh Kazımovun sözlərinə görə, bu rəqəm indiyədək qeydə alınan ən aşağı göstərici, yəni tarixi minimumdur. Bu dinamika həm məzənnə ilə bağlı gözləntilərin nikbin olduğunu, həm də milli valyutaya - manata olan inamın davamlı olaraq artdığını göstərir. Mərkəzi Bank sədri bu nəticəni milli iqtisadiyyatımız və milli valyutamız üçün ən mühüm nailiyyətlərdən biri kimi qiymətləndirir.