Türkiyə hibrid mühərriki kosmosda işə salan ilk ölkə olub

Türkiyə hibrid mühərriki kosmosda uğurla işə salan ilk ölkə olaraq kosmik tarixdə bir ilkə imza atdı. Ölkənin "Baykar" şirkətinin yaydığı məlumata görə, bu nailiyyət tamamilə milli imkanlarla həyata keçirildi. "Fergani Uzay" tərəfindən hazırlanan ilk kosmik transfer vasitəsi, "FGN-TUG-S01", kosmosdakı ən vacib manevrini müvəffəqiyyətlə başa çatdırıb. Bu əməliyyat yalnız Türkiyənin milli hibrid mühərrik texnologiyası ilə həyata keçirdiyi ilk sınaq deyil, həm də dünya miqyasında bir ilkdir. Hadisə dekabrın 6-sı, Bakı vaxtı ilə səhər saat 08:46-da baş verib.

"FGN-TUG-S01" bu əməliyyat zamanı əsas hibrid təkan sistemini aktivləşdirmişdi. Mühərrikin işə salınması cəmi 35 saniyə davam etdi və qüsursuz şəkildə icra olundu. Bu uğur, Türkiyənin kosmik texnologiyalar sahəsindəki irəliləyişini aydın göstərir. Birinci mühərrik manevri uğurla tamamlandıqdan sonra missiyanın ikinci vacib hissəsi, yəni "CubeSat"ın ayrılması prosesi başladı. "CubeSat"ın ayrılması da heç bir problem olmadan başa çatdı.

Bu müvəffəqiyyətli missiya, "Fergani Uzay" şirkətinin qarşıya qoyduğu böyük hədəflər üçün mühüm infrastruktur yaradır. Şirkət gələcəkdə "Uluğ Bəy" Qlobal Mövqeləndirmə Sistemini qurmağı planlaşdırır. Yeni texnologiya şirkətə imkan verir ki, gələcəkdə peyk qruplarını öz vasitələri ilə fərqli orbitlərə yerləşdirsin. Bu imkan Türkiyənin milli peyk sistemlərinin inkişafı və kosmik iddiaları üçün böyük bir addımdır.