Türkiyə MMU-nun nümayəndə heyəti ölkəmizdə səfərdədir (FOTO)

Türkiyə Milli Müdafiə Universitetinin (MMU) rektor müavini, professor Serdar Salmanın rəhbərlik etdiyi nümayəndə heyəti Azərbaycana səfər edib. Bu səfərin məqsədi hərbi təhsil sahəsində əməkdaşlığı və təcrübə mübadiləsini genişləndirməkdir. Məlumatı Müdafiə Nazirliyi yayıb.

Türkiyəli qonaqlar səfərə ilk olaraq protokollarla başlayıb. Onlar Fəxri xiyabana gələrək Ümummilli Lider Heydər Əliyevin və görkəmli oftalmoloq-alim, akademik Zərifə xanım Əliyevanın məzarlarını ziyarət ediblər. Həmçinin, nümayəndə heyəti Şəhidlər xiyabanı və Türk Şəhidliyini də ziyarət edib, gül dəstələri qoyaraq, şəhidlərin xatirəsinə dərin ehtiram nümayiş etdiriblər.

Ziyarətlərdən sonra MMU-nun Hərb Oyunları Mərkəzində rəsmi tədbir keçirilib. Tədbirdə general-mayor Arif Həsənov çıxış edib və qonaqları MMU rəhbərliyi adından salamlayıb. General Həsənov vurğulayıb ki, Azərbaycan-Türkiyə hərbi əməkdaşlığı dostluq, qardaşlıq və müttəfiqlik münasibətləri üzərində qurulub. O, bu müttəfiqliyin hər iki ölkədə hərbi təhsilin inkişafına böyük fayda verdiyini qeyd edib. General Həsənov Azərbaycan Ordusunda hərbi təhsil sahəsində aparılan islahatların müsbət nəticələrini də diqqətə çatdırıb.

Professor Serdar Salman öz növbəsində göstərilən səmimi münasibətə və qonaqpərvərliyə görə təşəkkürünü bildirib. O, təcrübə mübadiləsi məqsədilə qarşılıqlı səfərlərin həyata keçirilməsinin önəmini vurğulayıb. Tədbirdə MMU və onun tabeliyində fəaliyyət göstərən təhsil müəssisələrinin yaranma tarixləri, təhsil sistemləri, tədris prosesləri, eləcə də elmi fəaliyyətləri haqqında geniş brifinq təqdim olunub. Görüşün sonunda tərəfləri maraqlandıran suallar cavablandırılıb. Bu səfər iki qardaş ölkə arasında hərbi təhsil sahəsində əlaqələrin daha da güclənməsinə xidmət edir.