Türkiyədə ticarət mərkəzində yanğın baş verib

Türkiyənin Adana şəhərinin Seyhan rayonunda yerləşən ticarət mərkəzində güclü yanğın hadisəsi baş verib. Hadisə Yeşiloba məhəlləsində yerləşən ticarət mərkəzinin daxilində başlayıb. Məlumata görə, alov ilk olaraq üçmərtəbəli xırdavat mağazasında yaranıb. Yanğın qısa müddətdə böyüyərək ətraf əraziləri bürüyüb və yaxınlıqdakı digər obyektlərə keçib.

Hadisə haqqında xəbər daxil olan kimi fövqəladə xidmət orqanları dərhal hadisə yerinə cəlb edilib. Yanğının söndürülməsi üçün əraziyə çox sayda yanğınsöndürən maşın, təcili tibbi yardım briqadaları və polis əməkdaşları göndərilib. Xidmət personalı alovu nəzarət altına almaq üçün sıx iş aparır. Alovun geniş əraziyə yayılması səbəbindən söndürmə prosesi çətinliklə davam edir.

Hazırda Adana şəhərində baş verən bu böyük yanğının tamamilə söndürülməsi istiqamətində işlər davam edir. Hadisə nəticəsində ətrafdakı bir çox mağazaya ziyan dəyib. Bununla belə, yanğının hansı səbəbdən başladığı hələ bəlli deyil. Polis yanğının ilkin səbəblərini müəyyən etmək üçün yaxın zamanda araşdırmalara başlayacaq.