Vətənə, dövlətə xəyanətkar və satqın mövqedə olanlar qanunlar qarşısında cavab verməlidirlər - RƏY

İctimai müzakirələr əsasında formalaşmış qəti fikirlər cəmiyyətin diqqətini Ramiz Mehdiyevin dövlət çevrilişinə cəhd planına və bu planda yer alan Əli Kərimli kimilərə yönəldir. DTX (Dövlət Təhlükəsizliyi Xidməti) çərçivəsində həyata keçirilən araşdırmalar artıq real faktlar əsasında nəticələr verir. Bununla da ifşa edilmiş dövlət çevrilişi planının iştirakçıları barədə hüquqi ölçülər götürülür.

Bu fikirləri Milli Məclisin deputatı, "İki sahil" qəzetinin baş redaktoru Vüqar Rəhimzadə "Report"a açıqlamasında deyib. O bildirib ki, AXCP sədri Əli Kərimlinin, habelə onun evinə hər gün gəlib-gedən, partiyanın rəyasət heyətinin üzvü Məmməd İbrahimin evində axtarışların aparılması sözügedən ifşa prosesinin məntiqi nəticəsidir. Rəhimzadə qeyd edib ki, ortaya çıxan faktlar həm Ramiz Mehdiyevin, həm də Əli Kərimlinin fəaliyyətlərinin bütün dövrlərində Rusiyanın xüsusi xidmət orqanlarının planlarında yer aldıqlarını sübut edir.

Deputatın sözlərinə görə, Əli Kərimlinin hələ sovet illərindən "KQB"nin "Malış" təxəllüslü agenti kimi bir sıra siyasi təxribatlarda iştirak etməsi sirr deyil. Rusiyanın "Milli Şura" adlı layihəsinin də Kərimlinin nəzarətinə verilməsi təsadüfi olmayıb. Bu fikirlər birmənalı şəkildə Ramiz Mehdiyevə də aiddir. Onun fərqli dövrlərdə rusiyalı məmurlarla gizli ünsiyyət qurması, xüsusilə dövlət əhəmiyyətli proseslərdə Rusiya ilə məsləhətləşmələr aparması bilinir. Mehdiyev AMEA-da işləyərkən belə Moskvanın siyasi direktivləri ilə hərəkət edib. Bütün bunlar Mehdiyevin həyat və fəaliyyətində "KQB" və "QRU" izlərini açıq şəkildə göstərir. Bu detallar Mehdiyevlə Kərimlinin uzun illər ərzində formalaşmış və siyasi məqsədləri bəlli olan gizli əlaqələrini ortaya çıxarır.

İctimaiyyət də görür ki, Əli Kərimli bütün çıxışlarında Ramiz Mehdiyevi müdafiə edib. O, özünün və ağasının Rusiyanın adamı olmasına baxmayaraq, Azərbaycan hakimiyyətini "rusiyapərəst" olmaqda ittiham edib. Kərimli mitinq və aksiya ilə pərdələnmiş oyunlar vasitəsilə siyasi sabotajla məşğul olub. Maraqlı tərəf budur ki, Ramiz Mehdiyev vəzifəsindən azad edildikdən sonra AXCP və qondarma "Milli Şura" bir dəfə də olsun mitinq və aksiya keçirə bilməyib. DTX-nın Əli Kərimlinin və onun müşavirinin evində axtarışlar aparması AXCP sədrinin dövlət çevrilişinə cəhd planlarındakı yeri və rolu barədə ciddi sübutlara malik olduğunu göstərir. Rusiyanın çirkin planının ifşası fonunda Ramiz Mehdiyev-AXCP-"Milli Şura" üçbucağının xəyanətləri artıq sübuta yetirilməkdədir.

Vüqar Rəhimzadə əlavə edib ki, DTX bu araşdırmalarla təkcə Ramiz Mehdiyevin, onun əlaltıları olan AXCP və "Milli Şura" ilə oyunlarını ifşa etmir. Eyni zamanda, Rusiyadakı bəzi dairələrin perspektivdə Azərbaycanda təxribat, siyasi qarşıdurma törədilməsi və ictimai sabitliyin pozulması planlarında Əli Kərimlidən istifadə imkanlarını da məhdudlaşdırır. Rusiyanın Ukrayna ilə müharibə bitdikdən sonra Qafqaz üzərində təsir dairəsini yenidən bərpa etmək cəhdləri çərçivəsində, dövlətə xəyanətkar mövqedə olan AXCP-nin öndə gedəcəyi istisna edilmirdi. Bu səbəbdən dövlətə və Vətənə xəyanət yolunu tutan qüvvələrin vaxtında zərərsizləşdirilməsi dövlət təhlükəsizliyi üçün mühüm əhəmiyyət daşıyır. Deputat həmçinin dövlətə və xalqa xəyanət yolunu tutmuş AXCP kimi partiyaların qapadılması məsələsinin də gündəmdə olmalı olduğunu vurğulayıb.