WSJ: Trampın narkotrafikə qarşı mübarizəsi müdafiə startaplarının inkişafını stimullaşdırır

ABŞ Prezidenti Donald Trampın Latın Amerikasından gələn narkotrafikə qarşı apardığı mübarizə müdafiə startapları üçün geniş imkanlar yaradıb. Bu texnologiya şirkətləri hərbi alətləri antinarkotik əməliyyatların tələblərinə uyğunlaşdırıblar.

The Wall Street Journal (WSJ) bu barədə yazıb. Məqaləyə görə, müdafiə startapları öz dronlarını, sensorlarını, süni intellekt alətlərini və məlumat emalı platformalarını Trampın "narkoterrorizmə" qarşı mübarizəsi üçün ixtisaslaşdırılmış vasitələrə çeviriblər. Bu vəziyyət, ənənəvi hərbi sifarişlərdən kənarda yeni bazar seqmenti açır. Müəlliflərin qeyd etdiyi kimi, ABŞ-nin Karib hövzəsi və cənub sərhədində kampaniyanın gücləndirilməsi fonunda pilotsuz uçuş aparatlarına, sensorlara və süni intellektə olan tələbat sürətlə artır. Bu mühit müdafiə startaplarının böyüməsini birbaşa stimullaşdırır.

Bəzi startaplar artıq bu sahədə ciddi nailiyyətlər göstəriblər. Məsələn, "Shield AI" şirkətinin dronları 60 min funt kokainin rekord həcmdə müsadirəsində istifadə olunub. Sahil Mühafizəsinin məlumatına görə, onların "V-BAT" adlı modeli vasitəsilə 1 milyard dollardan çox dəyərində narkotik maddə ələ keçirilib. Bu faktlar Donald Trampın siyasətinin bu yeni texnologiyaların real sahədə tətbiqinə imkan yaratdığını göstərir. Bu cür sistemlərin istifadəsi narkotik daşınan gəmilərin və fərqli marşrutların aşkar edilməsi prosesini xeyli sadələşdirir.

ABŞ hərbi qurumları da texnologiyaya olan marağı artırır. Cənub Komandanlığı robotlaşdırılmış və pilotsuz sistemlər üçün "sınaq poliqonları"na tələbatın artdığını vurğulayır. Ordu həmçinin dronların qarşısını almaq üçün nəzərdə tutulmuş yeni komplekslər satın alır. Bu alınanlar arasında Ukrayna istehsalı olan "Moodro" sistemləri də var. Bütün bu fəaliyyətlər ABŞ-ın antinarkotik mübarizəni gücləndirmək üçün texnoloji həll yollarına böyük sərmayə qoyduğunu təsdiqləyir.