Xaçmaz rayonunda YAP-ın 33 illiyi qeyd olunub (FOTO)

Xaçmaz rayonunda Yeni Azərbaycan Partiyasının (YAP) təsis olunmasının 33-cü ildönümü münasibətilə tədbir keçirilib. Bu yubiley “Konstitusiya və Suverenlik İli” çərçivəsində təşkil edildi.

Yığıncaq böyük ehtiramla başladı. İştirakçılar əvvəlcə Ulu Öndər Heydər Əliyevin abidəsi önünə gül dəstələri düzüb, onun əziz xatirəsini yad etdilər. Mərasimdə Azərbaycan Respublikasının Dövlət Himni səsləndirildi. Daha sonra Ümummilli Lider Heydər Əliyevin və Azərbaycanın müstəqilliyi, ərazi bütövlüyü uğrunda şəhid olmuş qəhrəmanların xatirəsi bir dəqiqəlik sükutla anıldı.

Tədbirdə çıxış edən Xaçmaz Rayon İcra Hakimiyyətinin başçısı Elnur Rzayev partiyanın ölkənin inkişafındakı rolunu vurğuladı. O bildirdi ki, Heydər Əliyevin yaratdığı Yeni Azərbaycan Partiyası ölkəmizin hərtərəfli inkişafına mühüm töhfələr verib. Rzayev Prezident İlham Əliyevin rəhbərliyi altında Azərbaycanın əldə etdiyi tarixi nailiyyətləri diqqətə çatdırdı. Buraya 2020-ci ildə qazanılan şanlı Zəfər və 2023-cü ildə ölkənin suverenliyinin tam bərpa olunması daxildir. O qeyd etdi ki, əldə edilən uğurların əsasında dövlət başçısının milli maraqlara əsaslanan məqsədyönlü siyasəti və xalq-iqtidar birliyi durur.

Yeni Azərbaycan Partiyası Xaçmaz rayon təşkilatının sədri Məhəmməd Balaqadaşov partiyanın yaranma tarixindən danışdı. O xatırlatdı ki, 1992-ci il noyabrın 21-də Naxçıvanda Respublikanın müxtəlif bölgələrindən gələn 550 nümayəndənin iştirakı ilə keçirilən təsis konfransı tarixi əhəmiyyətə malikdir. O əlavə etdi ki, Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin rəhbərliyi ilə partiya nəinki ölkəmizin, hətta regionun aparıcı siyasi qüvvəsinə çevrilib. Şəhid anası Bibixanım Mirzəmmədova və digər çıxış edənlər YAP-ın mənəvi dəyərlərə və dövlət mənafelərinə əsaslanan fəaliyyətindən, habelə Respublika üzrə görülən işlərdən bəhs etdilər.

Tədbirin sonunda partiya sıralarına yeni qəbul edilən şəxslərə üzvlük vəsiqələri təqdim olundu. Mərasim yerli mədəniyyət işçilərinin hazırladığı musiqili proqramla başa çatdı.