Xankəndidə terrorçuluq törətməkdə təqsirləndirilən şəxsin barəsində cinayət işi məhkəməyə göndərilib

Azərbaycan Respublikasının Xankəndi şəhəri ərazisində törədilmiş terrorçuluq əməli ilə bağlı aparılan ilkin istintaq başa çatıb. Hadisə 2023-cü il sentyabrın 14-də odlu silah və döyüş sursatlarından atəş açılması, partlayış törədilməsi, eləcə də ikidən çox polis əməkdaşının qəsdən öldürülməsinə cəhd edilməsi faktları üzrə araşdırılırdı. Baş Prokurorluq tərəfindən aparılan istintaq yekunlaşdırılaraq cinayət işi baxılması üçün aidiyyəti məhkəməyə göndərilib. Bu barədə Baş Prokurorluq məlumat yayıb.

İstintaq tədbirləri nəticəsində Karen Avanesyan adlı şəxsin bir sıra xüsusilə ağır cinayətlər törətməsinə əsaslı şübhələr müəyyənləşdirildi. Xankəndi şəhərinin erməniəsilli sakini olan, 1967-ci il təvəllüdlü Avanesyan ictimai təhlükəsizliyi pozmaq və əhali arasında vahimə yaratmaq məqsədilə terror əməli planlaşdırıb. Onun cinayətkar niyyəti partlayışlar törətmək, insanları öldürmək və digər ictimai təhlükəli nəticələrə səbəb olmaq idi. Bu məqsədlə, Avanesyan 2023-cü ilin sentyabr ayına kimi Xankəndi ərazisində fəaliyyət göstərmiş qanunsuz silahlı birləşmələrdən “AKMS” markalı avtomat silahı, onun hissələrini və çoxlu əl qumbaralarını əldə edib, onları şəhər ərazisində gizlədərək uzun müddət saxlayıb.

Avanesyan cinayətkar niyyətini reallaşdırmaq üçün sentyabrın 14-də səhər saat 07 radələrində yaşadığı sosial sığınacağı tərk edib. O, gizlətdiyi silah-sursatları götürərək atəşə hazır vəziyyətə gətirdi. Saat 09 radələrində yaşayış olmayan başqa bir evə girib mövqe tutdu, polis əməkdaşlarının yaxınlaşmasını gözlədi. Polis əməkdaşlarının onun yerini müəyyənləşdirməyə çalışdığını və saylarının çox olduğunu görən Avanesyan, planlaşdırdığı terrorçuluq əməlinə başlamaq üçün şəraitin yetişdiyi qənaətinə gəldi. Gizləndiyi yerdən avtomat silahdan yaxınlaşan polis əməkdaşlarına nizamsız atəşlər açdı, ardınca isə əl qumbaralarını ataraq partlayış törətdi. Nəticədə üç polis əməkdaşı müxtəlif dərəcəli bədən xəsarətləri aldı. Hadisə yerindən təxliyə edilərək zəruri tibbi yardımlar göstərildiyi üçün onların həyatlarını xilas etmək mümkün oldu.

Qanunvericiliyin tələblərinə və edilən dəfələrlə xəbərdarlıqlara baxmayaraq, Karen Avanesyan hakimiyyət nümayəndələrinin qanuni tələblərinə tabe olmaqdan boyun qaçırdı. Buna görə polis əməkdaşları odlu silah tətbiq etməklə onu saxladılar. Daha sonra ona tibbi yardım göstərildi və xəstəxanada müalicə edildi. Toplanmış sübutlar əsasında Avanesyan Cinayət Məcəlləsinin 29,120.2.3, 29,120.2.4, 29,120.2.7, 29,120.2.11 (terrorçuluqla əlaqədar iki və daha çox şəxsi qəsdən öldürməyə cəhd), 214.2.3 (odlu silahdan istifadə etməklə terrorçuluq), 228.1 (qanunsuz silah saxlama) və 315-ci (hakimiyyət nümayəndəsinə qarşı müqavimət) maddələri ilə təqsirləndirilən şəxs qismində cəlb olunub. Xankəndi Şəhər Məhkəməsinin qərarı ilə onun barəsində həbs qətimkan tədbiri seçilib. Cinayət işi üzrə istintaq tamamlanaraq baxılması üçün Gəncə Ağır Cinayətlər Məhkəməsinə göndərilib.