Zəfər Günü münasibətilə “PAŞA Holding” və “Bravo” şəhid ailələrinə bayram sovqatları çatdırıb (FOTO)

“PAŞA Holding” və “Bravo” supermarketlər şəbəkəsi Zəfər Günü ərəfəsində şəhid ailələrinə növbəti bayram sovqatlarını təqdim edib. Bu dəstək “Vətən əmanətlərin keşiyindədir” sosial layihəsi çərçivəsində həyata keçirilir. 2023-cü ildən bəri aktiv olan proqram, 44 günlük Vətən Müharibəsində şəhid olan qəhrəmanların 18 yaşa qədər övladlarına yönəlib. Hər il Yeni il, Novruz, Qurban, Ramazan bayramları, eyni zamanda Zəfər Günü münasibətilə bu ailələrə xüsusi hədiyyələr çatdırılır.

Zəfər Gününün beşinci ildönümü ilə əlaqədar nəzərdə tutulan bu sovqatların paylanmasına noyabr ayının əvvəlindən başlanılıb. “Bravo” supermarketlər şəbəkəsi "Regional İnkişaf" İctimai Birliyinin könüllüləri ilə birlikdə əməkdaşlıq edərək, bayram paketlərini şəhid ailələrinə birbaşa çatdırır. Paketlərə fərqli ərzaq məhsulları daxil edilib. Proqramın əhatə dairəsi genişləndi: 2024-cü ildən etibarən antiterror tədbirləri zamanı şəhid olan şəxslərin övladları da layihəyə daxil edilib. Bu genişlənmə sosial dəstək proqramının ölkə üçün qurban verilmiş bütün ailələri əhatə etmək istəyini göstərir.

Hazırda layihə Vətən Müharibəsi, zəfərdən sonra baş verən sentyabr təxribatları və son antiterror tədbirləri zamanı şəhid olanların ümumilikdə 1000-dən çox ailəsini əhatə edir. Bu, 2000-dən artıq övlada birbaşa dəstək deməkdir. “PAŞA Holding”in həyata keçirdiyi bu proqram təkcə bayram hədiyyələri ilə məhdudlaşmır. Proqram çərçivəsində təhsil və səhiyyə sahələri üzrə də əlavə dəstək tədbirləri həyata keçirilir. Bu addımlar şəhid övladlarının gələcəyə inamla baxması üçün zəmin yaradır.