Zəfər xronikası. 27 oktyabr 2020-ci il: Birinci vitse-prezident Mehriban Əliyeva Ermənistanın Bərdədə törətdiyi terrorla bağlı paylaşım edib (FOTO)

2020-ci il sentyabrın 27-də Ermənistan silahlı qüvvələri cəbhəboyu genişmiqyaslı təxribat törətdi. Azərbaycan Ordusu buna cavab olaraq sonradan "Dəmir yumruq" adlandırılan əks-hücum əməliyyatına başladı. 44 gün davam edən Vətən müharibəsi təxminən otuzillik işğala son qoyulması və ərazi bütövlüyümüzün bərpası ilə nəticələndi.

Həmin dövrdə, 2020-ci il oktyabrın 26-da Azərbaycan Respublikasının Birinci vitse-prezidenti Mehriban Əliyeva Bərdə şəhərinə edilən terror aktı ilə bağlı açıqlama yaydı. O, Ermənistan silahlı qüvvələrinin döyüş əməliyyatları zonasından kənarda yerləşən Bərdə şəhərini raket atəşinə tutaraq humanitar atəşkəs rejiminin şərtlərini növbəti dəfə kobud şəkildə pozduğunu bildirdi.

Bu cinayətkar hücum nəticəsində mülki əhali ağır itkilər verdi. "Smerç" qurğusundan buraxılmış kasetli raketlərlə atəş nəticəsində dörd mülki şəxs, o cümlədən yeddi yaşlı bir qız həlak oldu. Dördü uşaq olmaqla, on dörd nəfər isə ciddi xəsarət aldı. Mehriban Əliyeva qeyd etdi ki, silahlı münaqişələr zamanı mülki şəxslərin qətlə yetirilməsi 1949-cu il Cenevrə Konvensiyalarının və bütövlükdə beynəlxalq humanitar hüquq normalarının ən kobud şəkildə pozulması deməkdir.

Vitse-prezident beynəlxalq birliyin susqunluğuna etiraz etdi. O sual etdi: "Erməni təcavüzkarlarının əli ilə daha neçə günahsız insan həlak olmalıdır ki, dünya birliyi bu cinayətləri dinməzcə seyr etməyə son qoysun?" Mehriban Əliyeva həlak olanların doğmalarına və yaxınlarına dərin hüznlə başsağlığı verdi, yaralananların isə tezliklə sağalmalarını arzuladı. O, Azərbaycanın qətiyyətini ifadə edərək sözlərinə yekun vurdu: "Biz öz torpağımızı təcavüzkarlardan azad edəcəyik və bu cinayətlərə son qoyacağıq. Uca Tanrı Vətənimizi qorusun!"