Zəfər xronikası. 8 noyabr 2020-ci il: Prezident İlham Əliyev xalqa müraciətində Şuşanın azad olunduğunu açıqlayıb (FOTO/VİDEO)

2020-ci il noyabrın 8-i Azərbaycan tarixinə əbədi yazılan bir gündür. Müzəffər Ali Baş Komandan İlham Əliyev həmin gün xalqa müraciət edərək Şuşa şəhərinin 28 il yarımlıq işğaldan azad edildiyini böyük fəxarət hissi ilə bəyan etdi. Bu hadisə hələ sentyabrın 27-də Ermənistan silahlı qüvvələrinin təxribatına cavab olaraq başlayan və sonradan "Dəmir yumruq" adlandırılan əks-hücum əməliyyatının zirvəsi oldu. 44 gün davam edən Vətən müharibəsi ölkəmizin ərazi bütövlüyünün bərpası ilə nəticələndi. Müraciətdən əvvəl Prezident İlham Əliyev və Birinci xanım Mehriban Əliyeva Fəxri xiyabanda Ulu Öndər Heydər Əliyevin, eləcə də görkəmli oftalmoloq-alim Zərifə Əliyevanın, Əziz Əliyevin və Tamerlan Əliyevin xatirələrini yad etdilər. Daha sonra onlar Şəhidlər xiyabanına gələrək suverenlik və ərazi bütövlüyü uğrunda canından keçmiş Vətən övladlarının xatirəsini yad etdilər, “Əbədi məşəl” abidəsi önünə əklil qoydular. Məhz bu məkanda dövlət başçısı xalqa müraciət edərək tarixi Qələbə müjdəsini verdi: “Şuşa bizimdir! Qarabağ bizimdir!”

Prezident İlham Əliyev Şuşanın azad edilməsinin döyüş meydanında qazanılan şanlı Qələbə olduğunu xüsusi vurğuladı. O bildirdi ki, 30 ilə yaxın davam edən mənasız danışıqlar heç bir nəticə vermədi, Ermənistan tərəfi sadəcə vaxt udmaq və status-kvonu möhkəmləndirmək istəyirdi. Azərbaycan isə siyasi iradə, cəsarət göstərərək xalqın maraqlarına cavab verməyən heç bir razılaşmaya getmədi. O, həmçinin torpaqlarımızın canı, qanı bahasına azad edildiyini qeyd edərək, şəhidlərimizə rəhmət, yaralı soydaşlarımıza şəfa dilədi. Şuşa Azərbaycanın qədim və tarixi şəhəridir, bütün Qafqazın incisi sayılır. Düşmən işğal dövründə mədəni irsimizə böyük zərbə vurmuş, tarixi abidələrimizi və məscidlərimizi dağıtmışdı. Prezident söz verdi ki, indi Şuşaya qayıtmışıq, bütün tarixi abidələr bərpa ediləcək, məscidlərdə yenə azan səsi eşidiləcəkdir.

Dövlət başçısı Qələbənin üç əsas səbəbini sadaladı. Birincisi, iqtisadi güc və müstəqillik vacib amil idi. İqtisadi cəhətdən heç kimdən asılı olmayan Azərbaycan bu imkanlar sayəsində Ordunu ən müasir silahlarla təchiz edə bildi. İkincisi, ölkə daxilindəki həmrəylik, milli birlik və xalq-iqtidar birliyi idi. Bu birlik Azərbaycana əlavə güc verdi, mənfur xarici dairələrin çirkin planlarını alt-üst etməyə kömək etdi. Üçüncüsü, beynəlxalq səviyyədəki uğurlardır. Azərbaycan bütün dünyaya Qarabağın əzəli torpaq olduğunu sübut etdi. Beynəlxalq təşkilatlar, o cümlədən BMT Təhlükəsizlik Şurasının dörd qətnaməsi Dağlıq Qarabağı Azərbaycanın ayrılmaz hissəsi kimi tanıdı. Bütün bu siyasi, iqtisadi və diplomatik uğurlar problem dondurulmuş vəziyyətdə qalmasının qarşısını aldı.

Bu illər ərzində Ordu quruculuğu işinin böyük hissəsi hərbi imkanların artırılmasına həsr olundu. Müasir silahlarla təchizatla yanaşı, dövlət başçısının təşəbbüsü ilə Azərbaycanda müdafiə sənayesi quruldu, Ordunun tələbatının böyük hissəsi daxili istehsal hesabına təmin edildi. Əsgərlərin və zabitlərin döyüş ruhu, cəsarəti və vətənpərvərliyi sayəsində 27 sentyabrdan 8 noyabra qədər Füzuli, Cəbrayıl, Qubadlı, Zəngilan, Hadrut, Suqovuşan və Şuşa da daxil olmaqla 200-dən çox şəhər və kənd işğaldan azad edildi. Prezident İlham Əliyev bu tarixi müjdəni məhz Şəhidlər xiyabanında verərək, şəhidlərimizin qanının yerdə qalmadığını bildirdi. O, Heydər Əliyevin ruhu qarşısında baş əyərək, ata vəsiyyətini yerinə yetirdiyini dedi. Bütün dünya azərbaycanlılarını bu Qələbə münasibətilə təbrik edən Prezident, "Dəmir yumruq" simvolunun həm gücümüzü, həm də birliyimizi təcəssüm etdirdiyini vurğuladı: “Əziz Şuşa, sən azadsan! Əziz Şuşa, biz qayıtmışıq! Əziz Şuşa, biz səni dirçəldəcəyik! Şuşa bizimdir! Qarabağ Azərbaycandır!”