Zəfərimizin 5-ci ildönümünə həsr olunmuş “Zəfər 5 il” könüllülər düşərgəsi həyata keçirilib (FOTO)

Azərbaycan Respublikasının Gənclər və İdman Nazirliyi, Gənclər Fondu, və Azərbaycan Könüllü Təşkilatları İttifaqının təşkilatçılığı ilə Quba rayonunda baş tutan “Zəfər 5 il” könüllülər düşərgəsi uğurla yekunlaşıb.

Bu düşərgə 44 günlük İkinci Qarabağ müharibəsində qazanılan tarixi Zəfərin 5-ci ildönümünə həsr olunmuşdu. Ümumilikdə, ictimai fəallığı ilə seçilən 150 könüllü gənc düşərgədə iştirak etdi. Oktyabrın 30-dan noyabrın 3-dək davam edən bu tədbirin əsas məqsədi könüllü gənclər arasında vətənpərvərlik ruhunu gücləndirmək idi. Təşkilatçılar həmçinin qazanılmış Zəfərin əhəmiyyətini təbliğ etməyi, dövlətçilik ənənələrini və milli dəyərləri inkişaf etdirməyi hədəfləyirdilər. Düşərgə könüllülərin bu dəyərlərə bağlılığını artırmağa, onların şəxsi inkişafına və komanda bacarıqlarının formalaşmasına dəstək verməyə çalışırdı. Əlavə olaraq, gənclərin birgə fəaliyyət təcrübəsini genişləndirmək də fəaliyyətlərin bir hissəsi idi.

Düşərgədən əvvəl Qubaya çatan Azərbaycan Könüllüləri, müasir müstəqil Azərbaycan dövlətinin banisi Ulu Öndər Heydər Əliyevin abidəsini ziyarət etdilər. Daha sonra iştirakçılar bir-biri ilə tanış olmaq üçün xüsusi oyunlar oynadılar. Rəsmi açılış mərasimində Gənclər Fondunun nümayəndəsi Emil Yusifov, "Nar" şirkətinin rəhbəri Hökümə Kərimova, və Azərbaycan Könüllü Təşkilatları İttifaqının sədri Vüqar Əliyev müzakirələr apararaq könüllü gənclərin suallarını cavablandırdılar. Düşərgənin ikinci günü iştirakçılar gənclər və idman nazirinin müavini İndira Hacıyeva ilə görüşdülər. Görüş zamanı ölkədə həyata keçirilən dövlət gənclər siyasəti, könüllülük hərəkatının inkişafı, gənclərin sosial fəallığı və onların ölkəmizin gələcəyindəki rolu barədə ətraflı fikir mübadiləsi aparıldı.

Beş gün ərzində könüllülərin asudə vaxtlarını məhsuldar dəyərləndirmələri üçün fərqli fəaliyyətlər həyata keçirildi. Xüsusi peşəkarlığı və təcrübəsi olan təlimçilər tərəfindən təlimlər, kreativ master-klasslar və vörkşoplar təşkil edildi. Bundan əlavə, Vətən müharibəsi qazilərinin iştirakı ilə panel görüşlər, komanda oyunları və intellektual yarışlar baş tutdu. Düşərgə müddəti ilə bağlı təəssüratlarını bölüşmək üçün könüllülər “Könüllünün bir günü” adlı videokontentlər hazırladılar. Gənclərin istedadlarını göstərmələri məqsədi ilə “SəhnədəSƏN!” yarışı da təşkil edildi. “Zəfər 5 il” adlı fləşmob keçirildi; bu fləşmob Azərbaycan Könüllülərinin Şanlı Zəfərimizə və Azərbaycanın qalib ruhuna olan inam və qürur hissini əks etdirdi. Bir-birindən maraqlı fəaliyyətlərlə yadda qalan tədbir, musiqi və əyləncə dolu bağlanış axşamı ilə başa çatdı.