Azərbaycan və Ermənistan gələn il sülh imzalayacaq? -Önəmli açıqlama

Azərbaycanın xarici işlər naziri Ceyhun Bayramov gələn il Ermənistanla sülh perspektivinə inandığını bəyan edib. Nazir İTV-yə verdiyi müsahibədə münasibətlərin normallaşması prosesi üçün son iki il müddətini nəzərə almağın vacib olduğunu bildirib. O, belə qısa müddətdə böyük irəliləyiş əldə etməyi nadir hadisə adlandırdı. Ceyhun Bayramovun fikrincə, qalib dövlətlə məğlub olmuş dövlət arasında normallaşma prosesinin bu sürətlə irəliləməsi tarixi dövr baxımından çox kiçik bir zamana sığır.

Nazir 2020-2023-cü illər arasındakı vəziyyəti xatırladıb. O, həmin dövrdə Ermənistan tərəfindən heç bir səmimi addımın olmadığını vurğulayıb. Azərbaycan isə bu müddət ərzində suverenliyin bərpası üçün addım-addım irəliləyirdi. Bu proses 2023-cü ildə tam başa çatdı. Bayramovun sözlərinə görə, Ermənistan yalnız yeni reallıqları başa düşdükdən sonra sülh sazişi üçün həqiqi addımlar atmağa başladı. Bu səbəbdən, bu cür proqresin və Vaşinston razılaşmalarının əldə olunması prosesini qiymətləndirərkən iki illik müddəti götürmək lazımdır.

Xarici İşlər Naziri sülh sazişinin imzalanmasına nikbin baxır. O, hərçənd 2026-cı ildə heç kəsin 100 faiz zəmanət verə bilməyəcəyini də əlavə etdi. Bayramov bu nikbinliyə səbəb kimi Ermənistanda hazırda gedən ictimai müzakirələri göstərir. Erməni cəmiyyəti qonşularla münasibətlərin normallaşmasının vacibliyi barədə danışır. Bu diskurs, gələcəkdə razılaşmanın əldə edilməsi üçün əsas yaradır.