Bu halda bank krediti silə bilər

Vəfat edən şəxslərin bank borclarının taleyi həmişə aktual suallardan biri olaraq qalır. Bəzi hallarda kredit silinir, bəzi hallarda isə borc vərəsələrə ötürülür. Bəs banklar bu prosesi necə tənzimləyir və borcların bağlanması hansı şərtlərə bağlıdır? İqtisadçı ekspert Əkrəm Həsənov mövzuya aydınlıq gətirib. Ekspertin sözlərinə görə, borcun silinib-silinməməsi ilk növbədə ölən şəxsin qalan mülkiyyəti və ya qanuni vərəsələrinin olub-olmaması ilə əlaqədardır. Həsənov bildirir ki, əgər ölən şəxsin borcunu ödəyə biləcək heç bir mülk və vərəsəsi yoxdursa, bu borc təbii olaraq ödənilməyəcək.

Mütəxəssis izah edir ki, vəfat edən şəxsin adına heç bir girov qoyulmuş mülk yoxdursa və ya onun borcu üzərinə götürəcək qanuni vərəsəsi mövcud deyilsə, bank həmin borcu geri almaqda çətinlik çəkir. Bu halda, ödənilməyən kredit borcu praktiki olaraq silinmiş sayılır. Borcların ödənilməsi məsələsi xüsusilə də girovu olmayan adi istehlak kreditlərində daha mürəkkəb olur. Məhz mülk və vərəsənin olmaması banka kreditin silinməsi imkanını yaradır. Bu qayda həm vətəndaşlar, həm də maliyyə qurumları üçün vacib məqamdır, çünki borc öhdəliklərinin kim tərəfindən daşınacağını müəyyən edir.

Lakin ipoteka kreditləri zamanı vəziyyət fərqli şərtlər daxilində tənzimlənir. İpoteka borcları adətən uzunmüddətli olur, buna görə də banklar belə kreditləri verərkən həyat sığortası tələb edirlər. Əgər kredit alan şəxsin sığortası varsa, o vəfat etdiyi təqdirdə, sığorta ödənişi borcun bağlanmasına şərait yaradır və bank zərər görmür. Ekspert qeyd edir ki, bankların digər növ kreditlər üçün sığorta tələb etməməsinin səbəbi isə vətəndaşların əlavə xərclərdən yayınmasıdır. Beləliklə, digər qısa müddətli kreditlərdə vətəndaşlar əlavə sığorta almaqda maraqlı olmurlar, bu da vəfat halında borcun bankın üzərinə qalmasına gətirib çıxarır.