COVID-19 peyvəndinin gözlənilməz təsiri

Atopik dermatit, yəni ekzema diaqnozu qoyulan uşaqlar COVID-19 peyvəndi vurulduqdan sonra gözlənilməz əlavə sağlamlıq faydaları qazanır. Onlar təkcə koronavirusdan qorunmaqla kifayətlənməyiblər. Amerika Allergiya, Astma və İmmunologiya Kollecinin (ACAAI) illik konfransında təqdim edilən bir araşdırma bunu açıq şəkildə ortaya qoyur. Məlumata görə, peyvənd olunmuş uşaqlarda infeksiyalar və allergik ağırlaşmalar daha az görünür. Bu mühüm kəşf xroniki iltihabi hallar yaşayan kiçik yaşlı xəstələrin immun reaksiyalarına peyvəndlərin necə təsir etdiyi haqqında yeni məlumatlar verir.

Tədqiqat 17 yaşdan aşağı 11 mindən çox ekzema diaqnozu qoyulmuş uşağı əhatə edib. Bu uşaqların yarısı peyvənd edilmişdi, digər yarısı isə peyvənd edilməmişdi. Nəticələr vaksin vurdurmuş uşaqlarda tənəffüs yolları xəstəliklərinin - bronxit, sinusit və pnevmoniyanın - nadir hallarda inkişaf etdiyini göstərir. Eyni zamanda, dəri infeksiyaları, məsələn, impetiqo və kontagioz mollyusk kimi xəstəliklər də onlarda çox az müşahidə olunub. Bu statistik fərqlər peyvəndin uşağın bədəninin iltihaba qarşı ümumi reaksiyasını sabitləşdirməyə kömək etdiyini göstərir.

Hətta allergik reaksiyaların özləri də peyvənd olunmuş qrupda daha az qeydə alınıb. Bu reaksiyalara astma, rinit və qida mənşəli anafilaksiya daxil idi. Alimlərin fikrincə, peyvənd ekzemalı uşaqlarda immun sistemini tarazlaşdırır və digər allergik xəstəliklərin yaranma sürətini azalda bilər. Tədqiqatın rəhbəri doktor Çjibo Yanq bildirib ki, əldə edilən nəticələr peyvəndlərin təhlükəsizliyini və xroniki iltihablı vəziyyətlərdə olan uşaqlar üçün onların potensial faydasını təsdiqləyir. Bu tapıntılar valideynlər və həkimlər üçün rahatlaşdırıcı bir məlumatdır.