D-8 Media Forumunda Bakı Bəyannaməsi imzalandı

Bakıda "Dialoqun, əməkdaşlığın və regional həmrəyliyin təşviq edilməsi" mövzusunda keçirilən D-8 Media Forumu əhəmiyyətli bir sənədlə yekunlaşdı. Üzv dövlətlər media sahəsində birgə inkişaf və əməkdaşlıqla bağlı Bakı Bəyannaməsini imzaladılar. İnkişaf etməkdə olan səkkiz ölkənin İqtisadi Əməkdaşlıq Təşkilatının (D-8) üzvləri olan Azərbaycan, Banqladeş, Misir, İndoneziya, İran, Malayziya, Nigeriya, Pakistan və Türkiyə hökumətlərinin və media nümayəndələrinin iştirakı ilə ilk dəfə təşkil edilən Forum 2025-ci il noyabrın 21-də Bakıda baş tutdu.

İştirakçılar bu təşkilatın gücləndirilməsi, habelə daha dinamik və nüfuzlu iqtisadi blok kimi inkişaf etdirilməsi sahəsində göstərdiyi liderliyə görə Azərbaycan Respublikasının Prezidenti İlham Əliyevə dərin minnətdarlıqlarını bildirdilər. Onlar D-8-in bütün üzv dövlətlərinin, xüsusilə informasiya nazirliklərinin, milli media orqanlarının və agentliklərinin Forumun işinə verdikləri fəal töhfələri yüksək qiymətləndirdilər. Bəyannamə D-8-in prinsiplərini təsdiqləyir və qlobal media mühitində daha fəal əməkdaşlığın böyük əhəmiyyət daşıdığını göstərir. Sənəd qarşılıqlı anlaşmanı, regional həmrəyliyi və ortaq inkişaf məqsədlərini təşviq etmək üçün media sahəsində əməkdaşlığın gücləndirilməsinə sadiq olduqlarını vurğulayır.

Əməkdaşlığın qurulması istiqamətində konkret addımlar atılacaq. Tərəflər D-8 Media Forumunun inklüzivliyi və ortaq məsuliyyəti təmin etmək məqsədilə üzv dövlətlər tərəfindən təşkil olunan institusional bir platforma kimi qəbul edilməsini təklif etdilər. Bundan əlavə, onlar D-8 Media Mükəmməlliyi Mərkəzinin (DMM) tezliklə fəaliyyətə başlamasına çağırış edirlər. Azərbaycanın təşkil edəcəyi bu mərkəz təlim, tədqiqat, rəqəmsal bacarıqların inkişafı və əlaqələndirilmiş kommunikasiya üçün nəzərdə tutulub. DMM vasitəsilə strukturlaşdırılmış potensialın artırılması proqramları, seminarlar və peşəkar mübadilələr inkişaf etdiriləcək ki, bu da D-8-in üzv dövlətlərdə institusional və insan resursları imkanlarını artıracaq. Həmçinin milli media orqanları, xəbər agentlikləri və ictimai yayımçılar arasında əməkdaşlıq möhkəmləndiriləcək. Bu, informasiya mübadiləsini artırmağa və birgə məzmunla bağlı təşəbbüsləri dəstəkləməyə kömək edəcək.

Bəyannamədə ciddi problemlərin həlli yolları da göstərilib. Orada paylaşılan fakt yoxlama mexanizmləri, ortaq yoxlama vasitələri və sürətli kommunikasiya kanalları vasitəsilə yanlış məlumatlandırma, dezinformasiya və nifrət nitqinə qarşı mübarizə aparmaq məqsədilə əlaqələndirilmiş səylərin təşviqi qeyd olunur. Tərəflər zərərli rəqəmsal məzmuna qarşı kollektiv dayanıqlığı təmin etmək üçün beynəlxalq media təşkilatları ilə tərəfdaşlığı gücləndirməyi planlaşdırırlar. Həmçinin jurnalistikanın etik standartlarını özündə əks etdirən, peşəkarlığı və dəqiqliyi əhatə edən vahid D-8 davranış kodeksinin hazırlanması dəstəklənir. Xüsusilə gənclər və müəllimlər üçün media savadlılığı təşəbbüslərinin inkişafı üzv dövlətlərdə rəqəmsal baxımdan məlumatlı vətəndaşlığı təşviq etməyi hədəfləyir. İmzalanan sənəddə Azərbaycanın DMM-dəki rəhbərliyi ilə sıx əməkdaşlıq ediləcəyi vurğulanır. Sonda bu Bəyannamənin həyata keçirilməsinin daha sıx qarşılıqlı əlaqəli və davamlı D-8 media məkanına töhfə verəcəyinə, ölkələr arasında sülhü və inkişafı dəstəkləyəcəyinə inanılır. Azərbaycan Respublikasının Medianın İnkişafı Agentliyinə Forumun uğurlu təşkili üçün minnətdarlıq bildirildi. Sənəd Bakı şəhərində qəbul edilib.