Dünya ondan danışır: Bir gecədə milyonçu oldu

Fransanın Lyon şəhərində yaşayan adı açıqlanmayan bir sakin, bir gecədə zənginliyi ilə ölkənin gündəminə çevrilib. Hər kəs bu gözlənilməz hadisədən danışır. Yerli media orqanlarının yaydığı məlumata görə, bu şəxs yeni aldığı evin həyətində hovuz tikmək niyyətində idi.

O, qazıntı işlərinə başlayanda tamamilə gözlənilməz bir kəşflə qarşılaşdı. Torpağın altından ağzına kimi dolu olan tam 5 ədəd plastik torba çıxdı. Torbaları açarkən onun gözlərinə inanmaq çətin oldu, çünki tapılan maddə təmiz qızıl idi. Bu gözlənilməz tapıntı ilə bir anda milyonçuya çevrilən Lyon sakini dərhal qərar verdi və bütün qızılları polis bölməsinə təhvil verdi.

Polis əməkdaşları qızılların oğurluq olub-olmadığını yoxlamaq üçün genişmiqyaslı araşdırmaya başladı. Araşdırmanın nəticəsi göstərdi ki, tapılan əşyalar heç bir cinayət hadisəsi ilə əlaqəli deyil. Qanun keşikçiləri müəyyən etdilər ki, evin əvvəlki sahibi 15-20 il əvvəl vəfat edib. Bu səbəblə vətəndaşın göstərdiyi nümunəvi davranış əsas gətirilərək, 5 torba qızıl ona geri qaytarıldı. Fransa mətbuatı qeyd edir ki, tapılan qızılların ümumi dəyəri 700 min avro təşkil edir.

Beləliklə, sadə bir tikinti işinə başlayan Lyon sakini, dürüstlüyü sayəsində həyatını tamamilə dəyişdirən böyük bir sərvət kəşf etmiş oldu.