Gələn il bu şəxslərə verilən ödənişlər artacaq

Gələn il işsizliyə görə sığorta ödənişlərinin artırılması gözlənilir. Hesablama Palatasının rəyinə əsasən, İşsizlikdən Sığorta Fondunun 2026-cı il büdcə layihəsində bu məqsədlə 28 milyon manat vəsait nəzərdə tutulub. Bu rəqəmlər sığorta mexanizminə ayrılan diqqətin artdığını göstərir.

Proqnozlara görə, işsizlik sığortası ödənişinin orta aylıq məbləği yüksələcək. Cari ilin sonunda bu məbləğin 441.67 manat olması gözlənilir, lakin 2026-cı ildə o, 450 manata çatacağı proqnozlaşdırılır.

Mövzu haqqında danışan iqtisadçı Xalid Kərimli, işsizlikdən sığorta haqqının yalnız rəsmi əmək müqaviləsi ilə çalışan və qanuni əsaslarla işdən çıxarılan şəxslərə verildiyini bildirib. Vətəndaşlar işsiz kimi qeydiyyata alınmaq üçün mütləq Dövlət Məşğulluq Agentliyinin yerli şöbələrinə və ya DOST mərkəzlərinə müraciət etməlidir, çünki bu müraciət olmadan status almaq mümkün deyil. İqtisadçı həmçinin vurğulayıb ki, sığorta ödənişlərinin məbləği birbaşa əməkhaqqının səviyyəsindən asılıdır. O, artımın minimum əməkhaqqına uyğunlaşdırılması məsələsinə də diqqət çəkib. Bu addımlar hökumətin işsizlikdən sığorta mexanizmini gücləndirmək istəyini göstərir.