İspaniyada Sel Fəlakəti: Onlarla İnsan Həyatını Itirdi

İspaniyanın şərq və cənub bölgələrində güclü yağış və fırtınanın səbəb olduğu sel fəlakətində 95-dən çox insan həyatını itirib.

Valensiya şəhəri ən çox zərər çəkən bölgələrdən biridir. 90-dan çox insan Valensiyada həyatını itirib. Yüzlərlə insanın da itkin düşdüyü bildirilir. Valensiyada itkin düşənlərin axtarışı davam edir. Kastilya-La Mançada da ən az 5 nəfərin itkin düşdüyü bildirilir.

Valensiya əyalətinin müxtəlif bölgələrində daşqınlar insanların evlərini su altında qoyub. Valensiya şəhərində hava limanının su altında qalması səbəbindən uçuşlar digər bölgələrə yönləndirilib. Dövlət Meteorologiya Agentliyi hadisəni "əsrin fəlakəti" adlandırır.

Valensiyada sonuncu dəfə bu qədər güclü yağış 1996-cı ildə müşahidə olunub. İspaniya hökuməti fəlakətin fəsadları ilə bağlı böhran masası yaradıb. Parlamentdə keçirilməsi planlaşdırılan bütün dinləmələr ləğv edilib.