Kofe ilə su içmək niyə vacibdir?

Son illərdə kofe istehlakının dünya miqyasında geniş yayılması onun sağlamlığa təsiri baxımından tez-tez müzakirə edilir. Bəzi tədqiqatlar kofenin faydalarını önə çıxarır, digərləri isə həddindən artıq istifadənin təhlükələrinə diqqət yetirir. Endokrinoloq həkim Lamiyə Nəbibəyli gündəlik kofein qəbulunun təhlükəsiz həddindən danışıb. Həkim bildirir ki, gün ərzində 500 mq-dan çox kofein qəbul edilməməlidir. Bu miqdar təxminən 3-4 fincan kofeyə bərabərdir.

Bu səviyyədə kofe içmək orqanizm üçün yalnız zərərsiz deyil, hətta müəyyən faydalar gətirə bilir. Məsələn, kofe qaraciyər funksiyalarını dəstəkləyir, yoğun bağırsaq xərçənginin yaranma riskini azaldır, Parkinson xəstəliyinin qarşısını almağa kömək edir və hüceyrə DNT-sini gücləndirir. Bu səbəbdən kofe istehlakı mütləq norma daxilində saxlanmalıdır. Həkim qeyd edir ki, normadan artıq kofein istifadəsi orqanizmdə ciddi asılılıq yarada bilər. Həddindən artıq doza, xüsusilə 5-10 qat artım, bəzi hallarda həyati təhlükə yarada bilir.

Axşam saatlarında kofe içmək yuxu rejimini pozur. Bu isə keyfiyyətsiz və səthi yuxuya səbəb olur. Əgər bir insan daim kofe içmək istəyirsə, bu, artıq kofein asılılığının əlamətidir. Mədə problemləri olan şəxslər, məsələn, qastrit, xora və ya refluks xəstəliklərindən əziyyət çəkənlər kofeni acqarına qəbul etdikdə xüsusilə diqqətli olmalıdırlar. Bu vəziyyətdə mədə turşusu artır və narahatlıqlar yaranır. Kofein miqdarını nəzarətdə saxlamaqla bu riskləri azaltmaq olar.

Həkim onu da əlavə edir ki, kofe ilə birlikdə su içmək daha faydalıdır. Su həm kofeinin bədəndə yığılmasının qarşısını alır, həm də onun tərkibindəki oksalatların sidik vasitəsilə atılmasına kömək edir. Bu proses böyrək daşlarının yaranma riskini azaltmaq üçün vacibdir. Eyni zamanda kofe qəbulu yeməkdən 1,5–2 saat sonra tövsiyə olunur. Çünki yeməkdən əvvəl içilən kofe qidadakı dəmirin sorulmasını azalda bilər. Həddindən artıq kofein qəbulu ürək-damar sisteminə təsir edərək ürək döyüntüsünü artırır, təzyiqi yüksəldə və çarpıntıya səbəb ola bilər. Bununla belə, kofenin müsbət tərəfləri də var; o, metabolizmanı sürətləndirir və II tip diabet riskini azaldır.