Polşa ölkə tarixinin ən böyük hərbi təliminə başladı

Polşa Müdafiə Nazirliyi ölkə tarixində indiyə qədərki ən böyük hərbi təlim proqramına start verib. Bu qərar Rusiyanın Ukraynaya hücumundan sonra yaranan artan təhlükəsizlik narahatlıqları fonunda qəbul edilib.

Polşa bu şərtlər altında özünün hərtərəfli müdafiə proqramına hazırlaşdığını bəyan edir. "Hazırlıq" adını daşıyan bu genişmiqyaslı proqram 2026-cı ilə qədər tam 400 min nəfərin təlim keçməsini nəzərdə tutur.

Proqram könüllü şəkildə həyata keçiriləcək. Burada iştirak üçün vətəndaşların peşəsinə baxılmır: tələbələrdən və özəl sektor işçilərindən tutmuş təqaüdçülərə və hətta şirkətlərə qədər bütün vətəndaşlar qatıla bilər. Polşa Baş Qərargah rəisi Vislav Kukula təlimin iki əsas məqsədini açıqlayıb.

Birinci hədəf vətəndaşların və cəmiyyətin dayanıqlığının gücləndirilməsidir. İkinci məqsəd isə hərbi ehtiyatların hazırlığının və potensialının artırılmasıdır. Bu təlimlər Polşanın regional müdafiə qabiliyyətini yeni səviyyəyə qaldırmağa xidmət edir.