Qonşu ölkədə havaya görə məktəblər bağlandı

Güclü hava çirkliliyi İranda, ölkənin cənub-qərbində yerləşən Huzistan əyalətində məktəblərin fəaliyyətini dayandırıb. Əyalət valiliyinin rəsmisi Mehran Ələm Əlhüdanın verdiyi məlumata görə, bu tədbir ibtidai və orta məktəblərə şamil edilib. Regionda yaşayan uşaqların sağlamlığını qorumaq məqsədi ilə məktəblər müvəqqəti bağlanıb.

Adı çəkilən təhsil müəssisələri noyabrın 21-nə qədər distant təhsil sisteminə keçib. Bu müddət ərzində dərslər onlayn formatda davam edəcəkdir. Lakin bütün təhsil müəssisələri bağlanmayıb; liseylər, universitetlər və dövlət qurumları öz fəaliyyətlərini normal rejimdə davam etdirirlər.

Vəziyyətin nə qədər davam edəcəyi Meteorologiya Qurumunun proqnozlarından asılıdır. Qurum havanın çirkliliyinin yaxın günlərdə də davam edəcəyini proqnozlaşdırır. Əyalət rəsmiləri əlavə edib ki, əgər hava şəraiti dəyişərsə və çirklənmə səviyyəsi azalsa, məktəblərin açılması barədə yeni qərarlar qəbul ediləcək.