BBC Trampa külli miqdarda təzminat ödəməkdən imtina etdi: Hüquqi mübarizə başlayır

Böyük Britaniyanın ictimai yayımçısı olan BBC-nin İdarə Heyətinin sədri Samir Şah, ABŞ-ın keçmiş prezidenti Donald Trampın 2021-ci ilin yanvarındakı nitqinin hissələrinin kəsilərək montaj edilməsinə görə üzr istəsə də, bu qalmaqala görə Trampa təzminat ödəməkdən qəti şəkildə imtina edib. Şahın açıqlamasına görə, qurum bu mübahisədə hüquqi yollarla mübarizə aparmaq niyyətindədir. BBC rəhbəri işçilərə göndərdiyi elektron poçt məktubunda mövqeyini izah edərkən, təkidlə bildirib ki, onlar lisenziya haqqı ilə maliyyələşən İngiltərə xalqının mənafeyini qorumalıdırlar. O, bu məsələdə böhtan iddiası üçün heç bir hüquqi əsas olmadığını vurğulayıb və qurumun hüquqi yolla mübarizə aparmaq əzmində olduğunu açıqlayıb. Tramp keçən cümə günü verdiyi açıqlamada BBC-nin üzrünü yetərli saymamış və montaj qalmaqalına görə 1 milyard dollardan 5 milyard dollara qədər təzminat tələbi ilə məhkəmə iddiası qaldıra biləcəyini bildirmişdi.

Mübahisəli hadisə 6 yanvar 2021-ci ildə ABŞ Konqresinin basqını günü baş verən hadisələrlə əlaqəlidir. BBC üçün kənar bir tərəf tərəfindən hazırlanmış “Panorama” sənədli proqramının bir hissəsində Trampın çıxışı o şəkildə montaj edilmişdi ki, sanki o, tərəfdarlarını Konqres binasını işğal etməyə çağırırdı. Sənədli filmdə keçmiş prezidentin "Hamımız birlikdə Konqres binasına gedəcəyik və mən də sizinlə olacağam. Çılğınlar kimi döyüşəcəyik. Əgər çılğınlar kimi döyüşməsəniz, artıq ölkəniz olmayacaq" ifadələri yer almışdı. Lakin sonradan ortaya çıxdı ki, "Çılğınlar kimi döyüşəcəyik" cümləsi çıxışın 54 dəqiqə sonrasından kəsilərək əvvəlki cümlələrə əlavə edilib. Bu montaj nəticəsində nitqin mənası ciddi şəkildə təhrif edilmişdi. Qalmaqal Daily Telegraph qəzetinin BBC-nin sızdırılmış daxili yazışmalarını yayımlamasından sonra böyüyərək ictimailəşdi və nəticədə BBC-nin Baş direktoru Tim Devi və Xəbərlər direktoru Deborah Turness istefa vermək məcburiyyətində qaldılar.

Trampın vəkilləri böhtan iddiasını Böyük Britaniyada qaldırmaqdan imtina edirlər, çünki hadisənin üstündən bir il keçməsi səbəbindən burada zaman aşımı məhdudiyyəti yaranıb. Buna görə də iddia sənədlərinin ABŞ-ın Florida ştatında təqdim edilməsi gözlənilir. Trampın hüquqşünasları iddia edirlər ki, BBC-nin yayımladığı montaj prezidentin "nüfuzuna ağır səviyyədə zərbə vurub və külli miqdarda maliyyə zərərinə yol açıb". BBC isə məhkəmə prosesində proqramın ABŞ-da yayımlanmadığını və ölkənin rəqəmsal platformalarında geniş şəkildə əlçatan olmadığını, bu səbəbdən ABŞ seçicilərinin onu izləmə imkanı olmadığını əsas gətirməyi planlaşdırır. Bu arada, Trampın milyard dollarlıq təzminat davası açacağını elan etməsindən sonra İngiltərədə çoxlu vətəndaş öz narahatlığını bildirmişdi. Onlar ödədikləri lisenziya haqları hesabına ABŞ prezidentinə təzminat veriləcəyi təqdirdə, abunəliklərini ləğv edəcəkləri ilə hədələmişdilər.