Çin Müdafiə Naziri ASEAN Görüşündə Regional Sülh və Sabitliyə Çağırış Etdi

Çin Müdafiə Naziri Donq Cun 2 noyabr şənbə günü Malayziyanın paytaxtı Kuala Lumpurda keçirilən 12-ci ASEAN Müdafiə Nazirlərinin Plus Görüşünə (ADMM Plus) qatılıb. Nazir qeyd edib ki, bu il görüş formatının yaradılmasının 15 illik yubileyidir. O, region ölkələrinin talelərinin getdikcə daha sıx əlaqəli olduğunu bildirib. Donq Cun çıxışında, bir tərəfdən sülh çağırışları və inkişaf axtarışları güclənsə də, digər tərəfdən yeni təhdidlərin və çətinliklərin hələ də ortaya çıxmaqda olduğunu vurğulayıb. Bütün qlobal dəyişikliklərə və problemlərə cavab vermək üçün Çinin təklif etdiyi Qlobal İdarəetmə Təşəbbüsünün (QİT) bir həll yolu təqdim etdiyini bildirən nazir, bu təşəbbüsün həm də ASEAN Xartiyasının və Cənub-Şərqi Asiya Dostluq və Əməkdaşlıq Müqaviləsinin əsas prinsiplərinə tam uyğun gəldiyini deyib.

Nazir öz çıxışında bütün ölkələri təməl hədəflər olan sülh və əməkdaşlığa sadiq qalmağa çağırıb. Onun sözlərinə görə, ölkələr fərqlilikləri bir kənara qoyaraq ortaq məxrəcdə birləşməli, birgə inkişaf üçün əl-ələ verməli və sülhün bəhrələrini paylaşmalıdırlar. Donq Cun, Çin və ASEAN ölkələrinin ortaq maraqlara malik yaxın qonşular kimi regional sülhün və sabitliyin təmin edilməsində konstruktiv rol oynamağa hazır olduqlarını ifadə edib. O, həmçinin Çinin regional strukturda ASEAN-ın mərkəzi rolunu dəstəklədiyini xüsusi qeyd edərək, region ölkələri ilə birlikdə regional sülhü qorumaq öhdəliyini öz üzərinə götürməyə hazır olduqlarını bildirib.

Çin tərəfi dialoq və məsləhətləşmələr yolu ilə fərqlilikləri aradan qaldırmağa, açıq əməkdaşlıq səviyyəsini artırmağa və etibarlı, sabitləşdirici bir qüvvə olmağa davam etməyə çalışacaq. Nazir, bu görüş çərçivəsində təhlükəsizlik sahəsində əməkdaşlığa töhfə verməyə davam edəcəklərini, ortaq gələcəyə sahib daha sıx bir Çin-ASEAN cəmiyyəti quracaqlarını və beynəlxalq, regional sülhü birgə qoruyacaqlarını söyləyib. Görüş əsnasında Donq Cun həmçinin Cənubi Koreya, Yaponiya və Avstraliyadan olan həmkarları ilə də ikili görüşlər keçirib.