Venesuela lideri Nikolas Maduro ABŞ hərbi təhdidlərinə qarşı xalqı birlik olmağa çağırır

Venesuela Prezidenti Nikolas Maduro Karib hövzəsində ABŞ-ın yaratdığı hərbi təhdidlər fonunda xalqı mütləq birliyə səsləyib. O, ölkə daxilində yayımlanan xüsusi televiziya proqramında gündəmə dair məsələləri qiymətləndirərkən, ad çəkmədən ABŞ-ın bölgədəki hərbi aktivliyini tənqid edib.

Maduro Venesuela vətəndaşlarına müraciət edərək, gələcəyi qurmağın hər bir venesuelalının vəzifəsi olduğunu bildirib. Prezident vurğulayıb ki, psixoloji müharibəni geridə qoymalı və onu məğlub etməyin ən yaxşı yolu istehsal etmək, əsərlər yaratmaqdır. O, həmçinin Qərb və "qrinqo" (ABŞ) mediasını ölkəsini məhv etmək istəməkdə, Venesuelaya nifrət etməkdə və paxıllıq etməkdə ittiham edib.

Maduro bu çıxışı zamanı ABŞ Prezidenti Donald Trampın Kolumbiya Prezidenti Qustavo Petronu "narkotik lideri" adlandırmasına kəskin reaksiya göstərib. O, bəyan edib ki, Prezident Petro Kolumbiyada narkotik qaçaqçılarına qarşı ən böyük mübarizəni aparan liderdir. Venesuelanın üzləşdiyi təhdidlər qarşısında Rusiyanın göstərdiyi dəstəyə görə Rusiya Prezidenti Vladimir Putinə xüsusi təşəkkürünü bildirib. Lakin o, beynəlxalq təşkilatların mövqeyini də tənqid edib. Birləşmiş Millətlər Təşkilatının (BMT) İnsan Hüquqları üzrə Ali Komissarı Volker Türkə müraciət edən Maduro, BMT-nin ABŞ-ın Karib və Sakit okeanlardakı hərbi əməliyyatları qarşısında səssiz qalmaması gərəkdiyini vurğulayıb. Eyni zamanda, o, Qəzzada atəşkəs prosesinin İsrail Baş naziri Benyamin Netanyahunun açıq şəkildə pozduğunu qeyd edərək, İsrail liderini qınayıb.

Digər tərəfdən, Venesuela hökuməti ABŞ hərbi aktivliyi ilə bağlı qonşu dövlətlə münasibətlərini gərginləşdirib. Venesuela Sülh, Ədalət və Daxili İşlər Naziri Diosdado Kabello keçirdiyi mətbuat konfransında ABŞ döyüş gəmisinin yerləşdirildiyi Trinidad və Toqabonun hökumətini hədəf alıb. Kabello iddia edib ki, Baş nazir Kamla Persad-Bissessar iki ölkə arasındakı əlaqələrə zərər verir. Nazir xəbərdarlıq edib ki, əgər ABŞ bu ölkənin ərazisindən istifadə edərək Venesuelaya hücum etsə, ölkəsi cavab vermək hüququnu özündə saxlayacaq. Qeyd edək ki, Venesuela Parlamenti oktyabrın 29-da ABŞ döyüş gəmisinin Karib hövzəsində yerləşdirilməsindən sonra, Trinidad və Toqabonun Baş naziri Kamla Persad-Bissessarı ölkədə "arzuolunmaz şəxs" (persona non grata) elan etmək qərarı qəbul etmişdi.