Admiral: NATO Rusiyaya qarşı qabaqlayıcı zərbələr endirmək imkanlarını araşdırır

Şimali Atlantika Alyansı (NATO) Rusiyanın aqressiv hərəkətlərinə cavab vermək üçün qabaqlayıcı tədbirlər görmək imkanlarını nəzərdən keçirir. Lakin bu tip qərarların qəbul edilməsi ciddi hüquqi çətinliklərlə üzləşir.

Bu barədə "Financial Times" qəzetinə NATO Hərbi Komitəsinin rəhbəri admiral Cüzeppe Kavo Draqone məlumat verib. Hərbi rəhbər qeyd edir ki, alyans vəziyyətlə bağlı hər şeyi araşdırır. O bildirir ki, hazırda kiberməkanda NATO daha çox reaksiya verməklə məşğuldur. Sadəcə cavab vermək əvəzinə, daha aqressiv və ya qabaqlayıcı şəkildə hərəkət etmək alyansın düşündüyü əsas məsələlərdəndir.

Admiralın sözlərinə görə, NATO bu "qabaqlayıcı zərbələri" "müdafiə tədbirləri" kimi qiymətləndirməyə çalışa bilər. Bununla belə, Draqone bu yanaşmanın alyansın adi düşüncə və davranış tərzindən kənara çıxdığını etiraf edir. Əsas çətinliklər "hüquqi çərçivələr", yurisdiksiya məsələsi və bu addımları konkret kimin atacağı ilə bağlıdır. Alyans bu cür əməliyyatların həyata keçirilməsi üçün dəqiqləşdirmələrə ehtiyac duyur.