Ankara Şəhər Şurası Azərbaycanın Türkiyədəki səfirliyi ilə əməkdaşlıq edəcək

Ankara Şəhər Şurası Azərbaycanın Türkiyədəki səfirliyi ilə əməkdaşlıq əlaqələrini genişləndirir. Şuranın sədri Halil İbrahim Yılmazın verdiyi məlumata görə, bu istiqamətdə səfirliklə aparılan danışıqlar müsbət nəticələnib.

Yılmaz bildirdi ki, Ankara Şəhər Şurası bu günə qədər bir sıra əhəmiyyətli tədbirlərə ev sahibliyi edib və Azərbaycanla hər zaman çox yaxşı əlaqələri olub. Yeni əməkdaşlığın nəticəsi olaraq, tərəflər Azərbaycanla bağlı xüsusi günləri birlikdə qeyd edəcəklər. O, həmçinin qeyd etdi ki, Azərbaycanlı qardaşlarımız Şuranın məkanında mövcud olan bütün səhnə imkanlarından istifadə edə bilərlər. Bu razılaşma iki ölkə arasındakı əlaqələrin mədəni və diplomatik səviyyədə daha da inkişaf etdirilməsinə xidmət edir.

H. İ. Yılmaz həm də Ankara Şəhər Şurasının fəaliyyətinə aydınlıq gətirdi. Qurum 2020-ci ildə təsis edilib, iki il əvvəl isə Şuranın tərkibində Diplomatik Məclis yaradılıb. Məclisin sədri tanınmış diplomat Metin Kılıçdır. Bu Məclisin əsas məqsədi Ankaradakı bütün diplomatik nümayəndəliklərlə əlaqələri genişləndirməkdir. Məqsəd diplomatiya mədəniyyətini gücləndirmək və paytaxtı xarici qonaqlarla birlikdə daha rəngarəng bir məkana çevirməkdir. Yılmaz, indiyə qədər bir çox ölkənin Türkiyədəki diplomatik korpuslarının Diplomatik Məclis vasitəsilə öz xüsusi günlərini burada qeyd etdiklərini söyləyib. Azərbaycan səfirliyinin bu təşəbbüsə qoşulması yüksək qiymətləndirilir.