Belçika NATO-nun 4-cü maddəsini işə salmaq niyyətindədir

Belçikanın müdafiə naziri Teo Franken ölkə ərazisində naməlum pilotsuz uçuş aparatlarının müşahidə olunması hallarının artması səbəbindən NATO-nun 4-cü maddəsini işə salmaq niyyəti barədə açıqlama verib. Nazir baş verən hadisələri çox ciddi adlandırıb. Onun sözlərinə görə, bu hallar təhlükəsizliklə bağlı çox ciddi narahatlıqlar doğurur və alyans çərçivəsində təcili müzakirələr aparılmalıdır.

Qeyd edək ki, NATO-nun 4-cü maddəsi alyans üzvləri arasında təhlükəsizlik məsələləri üzrə məsləhətləşmələrin başlanmasını nəzərdə tutur. Bu maddə, üzv ölkələrdən biri özünün ərazi bütövlüyü və ya təhlükəsizliyinin təhdid altında olduğunu düşündükdə işə salına bilər. Belçika tərəfi naməlum uçuş aparatlarının müşahidə olunmasını milli təhlükəsizliyə birbaşa təhdid kimi qiymətləndirir.

Teo Franken vurğulayıb ki, pilotsuz aparatlarla bağlı vəziyyət ciddidir. Bu hadisələr NATO çərçivəsində müttəfiqlərin dərhal bir araya gəlməsini tələb edir. Belçika yaranan bu narahatlıqları aradan qaldırmaq və NATO daxilində dərhal fəaliyyətə keçmək üçün beynəlxalq müstəvidə dəstək almağa çalışır.